Ka Khasi Students’ Union da pyntip ko lyngba kani ka kyrwoh cha waroh ki bei ki pa, ki payu para ka Bri U Ynñiawtrep wow husiar ki hawa phah ya ki khon næ ki payu para yong ki yow lai puræ næ kreh cha baar khamtam ha nongbah Delhi.
Ini i kyntu da wan hadien wa ka KSU Delhi Unit wa ki pulit ka New Delhi kawa tip kam ka Special Unit for North Eastern Region (SPUNER) da yoh ki wow pynlait nyngkong ha kani ka tayaw wa da dep ya kawi ka khyllood kawa na West Jaiñtia Hills kawa da chah thok ha ki Agent kiwa kular pynyoh kaam ya ka ha nongbah Delhi tangwa da chah ieñ pathan ko ha ki kaam dai pyn ya i doh yong ka. Ya kani ka kynthai da lai choo yaka daka seiñ na Ghazipur ha Delhi hajan khappood waka Uttar Pradesh.
Kani ka kynthai kawa na West Jaiñtia da yoh ko wow yut na kti ki damok haka miet ka 13 tarik heiwa ki dkhot ka KSU Delhi Unit hapoh i yahkhmat u Wallambok Nongsiej VP, da lai choo noh ya ka na katai ka thaw. Hadien ini da yoh yutip wa dang em sa kattu katni ki kynthai na ri-loom Jaiñtia kiwa dang chah ksoh ha kiwa khayi ya ki wei kini ki bru em ki ka kynhun wa yaar bha heiwa kiwa emkti toh kiwa na Assam kamjooh wa na Meghalaya.
Ka KSU Delhi Unit hajrong ini da ujor ko cha ka ka Delhi Police North East Cell wei da pyntip leh cha u Home Minister ka jylla u Lahkmen Rymbui yow pyntip ya oo ya ini i jia waroh yow yarap pynpoi yung ya kawa da cha pynlait wei wow pynlait ya kiwa dang chah kset pyrchah yei mon yong ki wei wow kem u kset ya kiwa emkti.
Hawa boodien ya kani ka kaam haka 15 tarik da yoh wow pynlait sa arngut ki khynthai kiwa na ri-loom Jaiñtia wei da kem ya kawi ka kynthai Khasi kawa tip kam ka Neha kawa na Nongstoin kawa emkti ha kani ka kaam wa uwi u chynrang wa tip kam u Abhinash Das uwa na Assam uwa man u kurim ko (Neha).
Nyngkong da chemdien ya ini da ka KSU New Delhi Unit lyngba Ka Facebook na u K. Amse u wakreh ha MP, ha ka 13 tarik uni u bnai ha i por 11:30 i miet.
Kamtæ ha i step ka 14 tarik da lai choo ya kani ka khynnah na Ghazipur iwa dang haap hapoh Delhi tangwa da poi wa u pood wa UP deiwa emlang ki dkhot ka KSU New Delhi Unit wei da yarap u SSP, CID Branch-Aditya Goenka wei ha kani ka jooh ka sngi da ujor leh cha ka Vasant Vihar PS.
Ha ka 15 tarik, u Vice President ka KSU New Delhi u Wallam K Nongsiej, ka Meghalaya Police kawa em ha Delhi hapoh i yahkhmat ka N. Rabha waka N. Dhar wa u D. Lyngdoh na SPUNER da lai ki cha i thaw wa tip kam ka Malviya Nagar yow chemdien ya kiwa dang ngat ha ini i jia. Wei na ini i thaw deiwa emlang ki pulit ka Delhi, Malviya Nagar da yoh wow pynlait ya kawi ka kynthai wei da kem ya kawi na Malviya Nagar wa sa kawi na Nebsarai kawa tip kam ka Neha kawa na Nongstoin wa u kurim ko uwa na Assam u Abhinash Das. Ya i pyrtuid tre ka Neha dang murieh.
Wei da yoh yutip wa dang em chooh ki nong Meghalaya kiwa emkti wei ka takit dang lai ko chakhmat.
Discussion about this post