Shillong: Uwa yahkhmat ka liang pyrchah ka Meghalaya Assembly u Dr. Mukul Sangma da pynbaad u wa em i wym chimkhia ka sorkar wa katni yow pyndooh yei sñiaw yaphær jaitbru neidaw iwa jia ha Ichamati.
Da ong u leh wa kani ka sorkar wa katni toh kawa ym hoi dooh na waroh.
“Da boonkaam ki cha iwi wow lute yaka jylla,” da ong u Dr. Sangma hadien wa kut ka yalang ka Congress Legislature Party (CLP) ynne ka sngi ha Shillong.
U Dr. Sangma da ong u wa i wym ye ka sorkar wow leh ya iwa emkaam heipor wa biang ha waroh iwa jia da wanrah ko ya ki yaklam iwa da wanrah yei sñiawthooh bakla hapyrdi ki jaitbru, ha ka imlang sahlang iwa da chlai cha ki Social Media iwa da pynbood naam yaka jylla.
Katkam wa ong u, da poi cha iwa man katni neidaw wa tlot ka sorkar kawa dang yoh thiah hajrong ini i kaam iwa toh u pynbait da slem bha.
U Dr. Sangma da ong u wa wym krehkaam ki kor ka sorkar manda emkaam wow leh yei kaam yong ka toh iwa sñiawkhia bha.
Da ong u leh wa ki kaam pyrchah yaka aiñ iwa jia toh neidaw wa ki bor sorkar da pynbor yaki wow embynta ki ha kini ki kaam
“Iyi leh ka sorkar manda em ki pynbaad wa sñiaw chyrkhei kiwa da pynpoor, ki wym man kiwa miat yaka jylla iyi iyi leh. Ki bru ka jylla toh kiwa maya yei chong suk. Ka sorkar yong i nachwa da ye ko wow jop ya kiwa boon ki moochynthut wei kani ka sorkar wa katni leh da yooluti yaka wow ye ko wow joop ya iwon iwon i eh wei wow pynbait ya kini heipor wa biang,” da ong u Dr. Mukul.
