Ka BJP Meghalaya da pynsñiaw ko yei sñiaw sarong wa uwa yahkhmat yong ka uwa man leh kam u MLA heijooh i por u Montri sorkar wa pait yaka chnat Animal Husbandry and Veterinary, u Alexander Laloo Hek da chah pynkup burom u da ka Dadasaheb Phalke Icon Award.
Ya kani ka khusnaam da e kti da u Montri khynnah ka sorkar pyrdi wa pait yaka chnat Social Justice, u Ramdas Athawale haka yalang wa da pynman ha NDMC Auditorium, Jantar Mantar, New Delhi ynnin ka sngi wei ya kani ka khusnaam toh kawa da e da ka seiñ kiwa chna phlim namo ka Film Organisation (NGO) kawa da pynkup burom leh ya kiwa boon ki MP wa MLA deilang wa kiwa em i sap ha ki kaam chna phlim wa kiwi de.
U Hek da yoh u ya kani ka Award deiwa yoh yei naam Best Icon Minister ka Meghalaya wa kam u Social Worker wow tipmit yei kreh chitom u neibynta ki paidbah ka Meghalaya wa neibynta ka ri waroh kawi.
Neiliang ka BJP da ong ko wa nadooh nachwa da ong ko wa u A.L. Hek toh uwa biang dooh u bru neibynta ka Meghalaya uwa ye ki bru wow burom, wow yahluti wei uwa ye leh wow wanrah ki laad ki luti neibynta ka roi ka paar iwa da dep u wow pynsakhiat la 20 snem ha ki kaam saaiñ hima.
I kreh chitom u toh yow wanrah yeiwa emkaam ki paidbah deilang wa i roi i paar ha waroh ki liang wei ki paidbah ka Constituency yong oo da pynyoo ki yei chaniah ya oo kut wa pynman Election.
U Hek da ong u wa kani ka Dadasaheb Phalke Award toh ka burom ya oo wei da ktah ko ya oo wei da pynchlur chooh chooh ya oo wow kreh chitom chooh chooh u neibynta ka jylla waka ri waroh kawi.
I pyntip na u Mariahom Kharkrang, Chief Spokesperson ka BJP Meghalaya Pradesh.
Discussion about this post