Ka Supercare Hospital da sñiawsarong ko wow pynbna wa u Founder wa Managing Director yong ka, u Dr. R. S. Thangkhiew, da yoh u wow pdiang ya ka khusnaam kawa em burom kawa tip kam ka Lifetime Achievement Award na ka North-East Liver Foundation Society ha ka 6th North-East Medicon 2026, kawa da pynman ha ka 6 tarik uni u bnai ha Guwahati, Assam.
Kani ka khusnaam man ko kam wow yaroh yeiwa da noh kyllooid u deiwa neh slem neibynta wow e i chakri wow sumaar paidbah da ki phaw snem.
Ya u Dr. R. S. Thangkhiew da kha ha ka 28-08-1957 ha Shillong, wei da man u kam uwi na kiwa yahkhmat ya ki laad sumaar paidbah kiwa thymme ha Meghalaya wa ka thaaiñ chaneiñ mihsngi. Da pyndep u yei puræ na PGIMER, Chandigarh, wei da liwan u cha cha Shillong ha ki snem 1980 kam u Doctorate in Medicine (DM) uwa nyngkong na ka jaitbru Khasi wei kam u DM Gastroenterology (i sumaar kpoh) uwa nyngkong dooh ka thaaiñ chaneiñ mihsngi.
U Dr. Thangkhiew da wanrah u ya chiboon ki laad wa ki jait sumaar wa thymme heiwa ha u snem u snem 1988 da sdang u ya kawa nyngkong dooh ka sumaar Endoscopy ha ka jylla, hadien ini ha u snem 1995 da wanrah u ya ka Video Endoscopy wa ka Video Colonoscopy.
Ha u snem 1999, da leh u ya ka rukom sumaar ERCP (Endoscopic Retrograde Cholangiopancreatography) kawa nyngkong ha ka thaaiñ chaneiñ mihsngi.
Deiwa pyrkhat jngai da sdang u ya ka Supercare Medical Centre ha Shillong ha u snem 1991 kawa da kylla cha ka Supercare Hospital ha u snem 2005.
Da man u leh kam u President wa nyngkong yong ka Indian Society of Gastroenterology – North-East Chapter ha u snem 2018.
Discussion about this post