U Vipin Bhati, uwa man u kurim ka Nikki Bhati kawa da yap hadien wa chah dat wei chah thang ko u Vipin wa ka bei u ha Greater Noida, da chah siat u ha kjat hadien wa pyrchang u wow yut na kti ki pulit.
U Vipin da chah kem u hadien wa ka kurim u, ka Nikki da yap ko heipor wa chah sumaar ha Safdarjung Hospital, Dehli ha ka 21 tarik uni u bnai. Ka payu ko kawa tip kam ka Kanchan, kawa bia wa u payu u Vipin uwa tip kam u Rohit, da pynbaad ko wa u Vipin deilang ka bei u kawa tip kam ka Daya da thang ki ka ka Nikki. Ka Kanchan da pynyoo ko leh yei Video wa dat ki ka ka Nikki wei iwi won i Video wa pynyoo ya ka Nikki wa hiar ko na rana deiwa kop diñ.
Ya u Vipin wa ka bei u da yoh wow kem tangwa ya u pa u uwa tip kam u Satyavir wa u payu u, u Rohit dang yut ki.
U pa ka Nikki, u Bhikari Singh Payla hawa yaklam wa kiwa thoh khubor ynne da ong u wa kwah u wow em wa siat ya u Vipin neibhah kini toh kiwa pynyap bru wei toh u thang leh yei yung ki. Deiwa khana leh wa ka Nikki toh kawa em u khon chynrang wa pait wa sumaar ko deiwa pynlai leh ya ka Parlour ko. Tangwa da pynchitom wei lehbeiñ ki ka deiwa emkti deilang waroh ka yung ki.
Katkam wa khana u heh pulit, da yah ki ya u Vipin cha i yung u yow lai thooh ya u klong wa em i kynja phniang wa pynemkaam yow thang ya ka Nikki wei heini i por da knieh u ya ka Pistol ki pulit wei da yut wei sdang siat u ki tangwa ki pulit da siat kylla ki oo wei da toh kuli u ha kjat.
Hawa yaklam u Vipin wa kiwa thoh khubor hapoh Hospital da ong u wa wym em leh u iyi iyi wei ka Nikki da yap hi ko wei i yakjai hapyrdi ka kurim wa u kurim da jooh jia hi ymtoh iwa phær.
Ka Nikki wa ka payu ko, ka Kanchan da bia ki ya kini ki chipayu kitæ u Vipin wa u Rohit, ha ka 10 tarik u Kmaichonglad (Dec) 2016. Wei katkam wa pyntip ka Kanchan neiliang u pa ki da e sñiawbha u da ka Top-Model Scorpio SUV, ka thuk-thuk Bullet (Royal Enfield), ka poisa wei ksiar tangwa kiwa ha-yung kini ki chynrang ym em hun ki wei da khñium ki deiwa ong wa ki that ki nep wa e ki toh kiwa chongdor Rs. 2 donhi.
Da khana ko leh wa u Vipin deilang u Rohit da jooh wiar miet ki wei manda Phone leh ym jooh rap ki wei lada kylli cheiwon em ki sdang ki wow pynkulmar pathan. Da pynlut por ki leh wa kiwi ki kynthai wei manda klam ya ki chaphang ini, chah dat wot ki. Da ong ko wa boon ki miet da hap ki wow yaam wei kattæ ym em de ko iyi iyi deiwa dooh ya ka diah ko.
Chooh chooh da pyntip ko wa ka deilang wa ka diah ko da sdang ki ya kawi ka Make-Up Studio, tangwa ka bei kurim u pa ki kurim ki ym em kmen ki yeini wei waroh ka poisa wa kamai ki da chim ki ka cha ki najrong wa dat ki ki. Wei lada ym em riñ Video ko yeiwa jia ym em wow tip yeiwa jia ya ka diah ko. Da khana ko wa neiliang yong ka da pyrchang ko wow theh da ka um yow tympleh yei diñ tangwa yaplær ko hapyrdi wa leh ko yeini.
Ka Nikki wa u Vipin em ki ya u khon chynrang wa 6 snem i rta uwa da sakhi yeiwa jia ya ka bei u heiwa da khana u wa da theh ki da iyi ræ iyi ha ka bei u wei da thaap ki ka chwa wow pynkop ki yei diñ deiwa pynemkaam da ka Lighter.
Discussion about this post