U khynroo Luigi Dalian Pasweth naka skur North Liberty Higher Secondary School Jowai, da man u uwi napyrdi kiwa psiah haka kyrdan Top-10 Merit List yong ka Result HSSLC (Science Stream), 2021 wada pynbna daka MBOSE ynne ka sngi. Hawa yaklam wa u Wyrta, da ong u wow poi chaka thong emkaam i kreh chitom, wei ha kam ini i por wa chah tynjooh haka Lockdown toh u tip bha wa kammon u pyrkhat ya idæ, neibhah wa ha kini ki por da hap u leh daka Online Class.
Neitæ emkaam u pynlai yumut hawa khreh kot wei toh u ka-it yeini, ymtoh u ap yei klam kiwa narood nakiar, neibhah toh u sñiawthooh wa i leh i yeiwa bha tam, i wym em pynsñiawsih ya kiwi.
Heiyatoh wa i lai luti yong oo hei puræ puthi hapyrdi i pynthut ka khlam, khana u wa ynnin u snem hapyrdi chibnai arbnai wa sdang ka Lockdown da ye bha u wow pynlai yumut hei puræ puthi, tangwa hadien katu katni por sñiaw u kamwa da hiar noh i sñiawsuk wow khreh kot neidaw wym yoh de u lai cha skur.
Tangwa hanla kattæ leh da pyrchang hi u wow khreh kot wei wow kreh chitom, deiwa puræ man-ka-sngi kamwa 4-5 kynta wei mynda poi Exam won kamwa 6-7 kynta.
Kamwa haka Result MBOSE Class 10 yong u snem 2019 leh da psiah u hapoh ka Top-20 deiwa yoh 3rd Position, kamtæ i sñiaw ha oo nang pynbor chooh chooh i ya oo wow rap kreh chitom yow poi biang chakhmat ha kani ka kynti.
Neiliang ka bei u pa yong oo wa kynthup u A. C. Shullai waka M. Paswet, khana ki wa kamwa da jooh rah naam teiñ u haka Result MBOSE Class-X, waroh hi yooluti ki wow poi biang u chakhmat, tangwa i pynthut won ka khlam da pynsorsa mynsien khyrngang ko ya ki.
Kam u pynkynmoo nadooh wa ka skur North Liberty Higher Secondary School Jowai, sdang ko yaka Science Stream ha u snem wa nyngkong u 2019, da khur Top 10 ko arngut, ha u snem 2020 ym em yoh ko wei ha uni u snem won da yoh biang ko uwi.
Katkam i khana u Principal ka North Liberty u Richard Uriah da ong u wa neiliang ka skur da ya leh ki iwa bha tam yaki khynnah skur wot hapyrdi i pynthut ka khlam, wei chiboon hi i jop wan i lyngba ka bei u pa yong u Luigi Dalian Paswet wa kiwa sikai kamjooh da yarap bait ki yei emkaam yong oo.
“Ym ye i u em ya kiwa sikai kiwa biang tam haka pyrthai, tangwa em won i ya kiwa sikai kiwa da pyrchang u leh iwa bha tam heiyatoh waka puræ puthi ki khynnah skur,” ong u Principal ka North Liberty.
Da khana u wa hadien wa wan ka khlam, da pyrchang ki ya ki laad ki luti u yarap ya ki khynnah skur, deiwa bood yei nongmuna kiwi won hapoh ka ri, wei kamjooh deiwa yarap ya ki lyngba ki Online Class.
Katwa ya kitu ki wym ye u yoh ka Online Class neidaw i thut Network, da riñ dur ya iwa sikai yow ye ki pait ha iwon iwon i por, wei najrong kini da pynemkaam haroh ki lyngba u WhatsApp wa kiwi kiwi won ki laad.
Ong haroh u wa ki khynnah yong ki da leh bha hi ki ha uni u snem neibhah naka 82% kiwa Pass, da em 49 ngut kiwa yoh Distinction, 2 ngut kiwa yoh Distinction waroh ki Subject, kiwa yoh First Division 28 ngut wa Second Division 10 ngut.
U Luigi da yoh u leh ya ka Highest Mark ha ka English kamjooh ka Distinction ha ka English, Maths, Physics, Chemistry, Biology wa ka Alternative English. Waroh ki Marks da yoh u man ki 470 heiwa uwa yoh wa ar da yoh u 471 katwa kawa yoh nyngkong da yoh ko 477.
