Ka Meghalaya State Rural Livelihoods Society, Block Mission Management Unit (BMMU) Mawryngkneng, East Khasi Hills District ynne da pynman ko ya ka SHG Mela ha chnong Smit, East Khasi Hills District heiwa u Banteidor Lyngdoh, Montri ka Agriculture and Farmer’s Welfare da wan u kam u kongsan deiwa emlang leh u Lambor Malngiang, MLA wa MDC ka thaaiñ kam u symbood kongsan.
Hawa e yei klam ha ka yalang wai, u Banteidor Lyngdoh da pynsñiaw u yei kmen wow yoo yei sdang boon ki kynthai wa seiñ ya ki SHG kiwa da em i bynta wow pynku yei yoh i kot ka imlang sahlang. Da kyntu u leh ya ki SHG wow ya tylli ki wei wow kreh ki yow man kiwa jop hei kaam yong ki. Da ong u leh wa ya ka poisa wa yoh yarap toh u pynemkaam hok ya ka yow kyntu kynrong chooh chooh yei khih ki wow yoh myntoilang da waroh ki dkhot. Da khut u leh ya kitu ki wym pu em yoh ya ka poisa yarap hapoh ka NRLM wow wan ki chakhmat wow yaleh ya kani.
Da klam u leh chaphang i thmu kani ka Mela kawa toh u man kam ka rynsan ya ki SHG wow pynyoo yei sap i phong yong ki kamjooh ki mar ki mata wa dai ki kamjooh yow yachem para SHG yow ya e kylliang yei buit wei wow yarap kylliang.
Da ong u leh wa kam ki SHG toh u booh ki ya ka thong yow man ko leh kam ka yakob para SHG yow pynmih ya ki mar wa bha wei kiwa phær tam.
U Montri ha kani ka sngi deilang wa u MLA da saam ki ya ka Cheque hapoh ka NRLM cha 8 tylli ki Village Organisations wa ki Sanction Letter cha ki 3 tylli ki SHG.
Kiwi de kiwa da emlang ha kani ka sngi toh u P T Passah, Project Director, DRDA, East Khasi Hills, u R Kynta, COO, MSRLS wa kiwi kiwi de.
