Ynne ka sngi kam chibynta wow yarap ya ki College ka jylla lyngba ka People’s College Scheme, u Montri ka chnat puræ puthi ka jylla, u Lahkmen Rymbui da ekti u ya ka chithi (Order) wow yarap su tulop cha ki 19 ngut kiwa sikai (Lecturers) ka Shangpung College ha ka yalang wa da pynman ha kani ka thaw sikai.
Ha kani ka sngi da emlang leh u MLA ka thaaiñ, u Comingone Ymbon, u Addl. Chief Secretary ka jylla, u DP Wahlang wa kiwa sikai kamjooh ki khynnah yong kani ka College.
Hawa e yei klam ha kani ka sngi u Lahkmen da ong u wa kani toh ka sngi ka wow sahkynmoo ya kani ka College wei man ko ka sngi wa ka sorkar pynkhyrngiat ko ya ka kiwa pynlai wa kiwi tawon kiwa artatien deiwa ong cheiwon u poi wei ymye ko u man khlem i yakrehlang.
Da ong u wa kani ka sorkar MDA hapoh i yahkhmat u Conrad Sangma da pyndep ko yeiwa da kular ko.
Da ekhublei u ya kiwa kitkaam ka chnong waroh, khamtam ya ka Dorbar Chnong Shangpung Pyllun kawa da pynlai ya kani ka College.
Chooh chooh da ong u wa lada yohbor na ka AICTE, ya ka Engineering College ha Shillong, ka College of Planning and Architecture ha Tura u man ko hapoh u snem 2022 wei kini toh ka thong ka sorkar heiwa da chim rai ha u snem 2018.
