U Montri Rangbah ka jylla, u Conrad Sangma ynne ka sngi da ong u wa ka liang pyrchah namo ka Congress ym tip de ko deiyi u leh hadooh wa katni da pyrchang ko wow tba syndon yei long i man yong samen kiwi (Personal Attacks) heiwa da pynemkaam ko ya ki kyntien kiwa ymye de u pdiang khamtam na ki bru wa da heh da san dooh na ka.
U Conrad da ong u wa ha i rta yong oo wa kreh u ha ki kaam saiñ hima ym jooh yoo u wa wiarnar ka liang pyrchah hadooh kat deini. Deiwa wyrai u ya ki khlieh yong ka Congress katni.
“Da khyrngiat O wa em kiwa Phone ha ki sngi wa dadep na ki MLA ka Congress lakam wow paan-maap ki wei sñiaw sarom ki leh wow yoo ya ki kyntien wa klam ki heh ka Party,” da ong u Conrad.
U Conrad da pynbaad u leh wa ka liang pyrchah da yaleh ko wow tympiah ya ka sorkar Meghalaya Democratic Alliance (MDA) da slem tangwa boonsien hi ki lok ha ka sorkar synrop wa kyrchaan ya ka National People’s Party da wan ki chaphrang deiwa ong wa ka sorkar u pteiñ ko kamwa jooh.
“Yoo lakam wym toh de wa kwah ki yei roi i paar, wa i bha i miat ki paidbah tangwa du wow pynhaap sorkar yow yoh biang u wan hei bor,” da ong u Conrad.
Deiwa pdiang leh wa em hi ki moochynthut wei ha kamni kini ki por emkaam ya waroh wow krehlang ki.
Kamtæ u Conrad da tyrwa u ya i krehlang yong waroh deiwa kyntu kyrpang ya ka liang pyrchah, ki heh ki seiñ saiñ hima wa ka imlang sahlang wow yieñ pyrchah ya ki bru wa kwah u myntoi samen ha ki kaam saiñ hima.
“Da pyrchang ki wow leh ya kiwa boon ki jait tangwa ym jop ki. Lada kwah ki u lehke lane ym kwah ki. Tangwa daw poi i por wa emkaam wow pyrkhat ya ki paidbah wa ki kaam wa em hakhmat wei wow ya krehlang,” da ong u Conrad deiwa kyntu ya ka liang pyrchah wym toh wow klam da ki kyntien khutia mutia.
