Yooluti ka BJP wow poi hei bor ha Meghalaya kamwa man ha Gujarat wa Himachal Pradesh

Shillong: Ka BJP Meghalaya da yooluti ko wa u ye ko u leh ya i jooh hadien wa jop ko ha Gujarat wa ha Himachal Pradesh ynne ka sngi ha ka Election wow wan hapoh ka jylla.

U Meghalaya BJP President, u Shibun Lyngdoh da yaklam u wa kiwa pathai khubor heipor wa lehkmen u deilang wa kiwa kreh ka Party ynne ka janmiet wei da ong u wa kiwa kreh ka Party ki u kreh ki wow pynpoi ya ka jylla kam sa kawi ka jylla wa em hapoh i synchaar ka BJP.

Hawa kylli won wa kammon u jop ka Party heiwa hapoh ka jylla ki paidbah boon wa pait ya u kyrtong bar ya ka Party da jubab u deiwa ong wa katni waroh ini da sdang kylla i wei ym du kiwa heh spah wa emlaad wow jop Election.

“Ka BJP ngait ko wa kam ka seiñ i bor yong ka toh ha kiwa kreh yong ka kiwa da pynkhreh chitom wow pynkhlan ya ka nadooh kiwa kreh ha ki Polling Booth hadooh kiwa lai yalap Election,” da ong u Lyngdoh.

Related posts

Em 151 tylli ki kreh wa thylli, phah u Wailad ya ka DSC wow thooh lada dang em chooh kiwa wa lait

May 16, 2025

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Da ong u leh wa ka seiñ da kwah ko u sai ya ki kyrtong kiwa da pynheh pynsan ko wei hadooh katni da dep seiñ ya 1820 tylli ki Booth Committee wa 60 tylli ki Mondal.

“Ha waroh ki 60 tylli ki Mondal da dep jied kyrtong i wei kattu chong ha ka Centre Election Committee wow rai ya uwon wow e Ticket.”

Yei daw won wa ym em chong lang ki 4 ngut ki MLA wa katni ha ka rynsan wa u Modi heipor wa wan u cha Shillong da ong u wa em kiwa ym em ha Shillong wei em won wa ym ye ki u pynbiang ki kot ki sla wa emkaam wow chong lang wa u Montri Rangbahdooh ka ri.

Da ong u leh wa da sñiawkmen bha u wa da ye u pynhaap ya ka Congress ha Himachal Pradesh iwa pynyoo wa ki paidbah kwah ki u embynta wa ka sorkar pyrdi wa ki kaam pynroi wa da wanrah ko wei ini da pynyoo wa ka Congress da rem ko ha ki kaam yong ka.