U montri rangbah ka jylla, u Conrad K Sangma da ong u wa ka sorkar da yoouluti ko wow ye u pyndam noh yei pyndooh bordiñ ha ka jylla hapoh 36 kynta, hadien i ya pynbait ka wow man mynstep ka sngi hapyrdi u montri ka chnat bordiñ ka jylla, u James PK Sangma wa u montri ka sorkar pyrdi wa pait yaka Power Ministry, u RK Singh wa ka National Thermal Power Corporation heiwa da dep leh wow yachem ki ynnin ka sngi.
Da pyntip u wa ka sorkar jylla da kyrpaad ko ya ka Power Ministry wow tuklar hajrong ka soskular wa da soi waka NTPC neibhah ym yahap wa ka NTPC u tuklar ko wow phah pyndooh bordiñ ya kiwi ki Company hawa khlem chim ya ka bordiñ na ka NTPC. Da pyntip u wa i yaklam ynne da lai ko wow chna biang ya ka Letter of Credit tangwa hadooh mynstep ym ye wow pyndam noh yei pyndooh bordiñ.
U Conrad da ong u wa ka MeECL ka sahram ko ha kiwa boon ki Company pynmih bordiñ, tangwa lyngba ka Atmanirbhar Loan na ka sorkar pyrdi kawa T.1345 klur da su leh cha kini ki Company wa da phah bait lyngba ka RAC ym na ka sorkar jylla ne ka MeECL, heiwa da pyntip leh wa na ka T. 300 klur yong ka bynta wa nyngkong, da dep wow su cha waroh ki Company wa kynthup cha ka NTPC.
Da pynsñiaw u leh yei lynngoh wa ka NTPC da ye kow wow phah khang u pynpoi ya i bordiñ ha ka jylla neibhah wa katni ka jylla ym em de thied bordiñ ko naka NTPC, wei i pyndooh bordiñ man ko kawa khlem poi pyrkhat wei ka wym jooh jia ha ini i rukom.
U Conrad da pyntip u leh wa em ka soskular wow yasoi wa ka NTPC nadooh u snem 2007 wow chim ya i bordiñ na ka Bongaigaon Thermal Power Station, wei katkam katai ka soskular, waroh ki jylla ha ka thaaiñ North East ki hap ki wow chim ya i bordiñ na katai ka thaw, wei lada ym bien ki wow chim leh, ki hap ki wow su yaka Fix Charge cha ka NTPC, wei kani ka soskular da wanrah ko yei eh ya ka jylla wei wow pynchait leh ya ka MeECL.
Da pyntip u wa hajrong ini, na i por cha i por ka sorkar jylla da thoh ko leh cha ka sorkar India wa cha ka NTPC wow pynthymme noh ya ka soskular.
