Ynne ka sngi, u Montri Rangbah ka jylla, u Conrad Sangma da lai pait u ya ka Shillong International Centre for Performing Arts & Culture (SICPAC) kawa dang chna kawa em ha Mawkasiang, New Shillong ka wow man kam ka thaw wow pynman ya ki tamasa rwai, ki chaad wa kiwi kiwi de.
Ya kani da chna yow yatoh kyrdan ko wa ka juk kawa katni kawa daw pait da ka chnat Arts & Culture ka Meghalaya wei da kyrchaan poisa da ka Ministry of DoNER wa pynkreh da ka NEC hapoh ka NLCPR waka Ministry of Tribal Affairs ka sorkar India.
Hapoh kani ka SICPAC da em ka Multipurpose Theatre kawa hoi u chong 1739 ngut ki bru, ka rynsan kawa ye u pynskit wa ki rukom pynthaba wa har rukum yow pynman kyrpang ya iyi iyi wa da pynman heni.
Da em leh ka Blackbox Theatre kawa hoi u chong 574 ngut ki bru, ka thaw pynyoo leh ya ki phlim, wa ka wi ka Theatre wa khian wa hoi u chong 302 ngut ki bru kawa hoi wow pynman yei leh Drama wa ki chaad.
Daw em leh ka VIP Lounge, ka VIP Banquet Hall waka Tribal Museum.
U Conrad da pynsñiaw u yei kmen deiwa ong wa kani daw man ko kawa bha tam kam kani ha ka thaaiñ mihsngi wei da yooluti u wow wai noh ya ka ym slem de.
