Kam chibynta i lai chakhmat i pait bniah yei chait i khiah ki kynthai, ki manbei katkam ka thong yong ka Swasth Nari, Sashakt Parivar Abhiyaan Campaign kawa da sdang nadooh ka 17 tarik ha waroh kawi ka ri, kamtæ ka West Jaiñtia Hills District leh lyngba ka yung krehkaam yong ka District Medical & Health Officer nadooh katai ka sngi da lai luti ki na kawi ka chnong cha kawi won yow pynman ya ki Health Camp wa kyrpang wei ha ka 29 tarik da pynman ha Ummulong CHC heiwa da sakhi yei wan mih kiwa boon ki paidbah wow phah pait bniah yei chait i khiah ki.
Ha kani ka Health Camp wa kyrpang wa da pynman ha Ummulong CHC, da wan sakhilang leh da u Lat ka jylla u C.H. Vijayashankar kam u kongsan hanla hapyrdi i chitom u wow lai heiwa da emlang u Montri i chait i khiah, u Wailadmiki Shylla chirup i emlang u Dr. N. Kharsahnoh, Director of Health Services MCH&FW, ka B. Blah, Additional Deputy Commissioner, WJH, ka Dr. P. Shylla DM&HO, WJH, ka Dr. H. Uriah, District MCH Officer WJH wa kiwi najrong kiwa kreh ka chnat i chait i khiah, ki paidbah, ki khynnah skur wa kiwi.
U Wailadmiki Shylla hawa klam ong u wa chibynta ka jaitbru yong i toh kawa kheiñ kyrpang bha ya ki kynthai, tangwa heiwi i liang won sñiawsih wow yoo yei ku i khlaad ki manbei heipor kha khon, kamjooh leh i khlaad ki khonboo.
Hawa kyntu ya ki manbei wow sñiawthooh ki yei pun i kha, ong haroh ki katkam wa lai i por ki manbei ym em de khlan i doh i pran ki wow kha khon boon ngut, ymtoh de kam ha ki por nachwa lada kha palat 10 ngut leh ym em ktah iyi iyi.
Neitæ hawa kyntu ya ki paidbah wow chimkhia pynpsiah pyrtuid hapoh ka Scheme MHIS khnang yow yoh yarap hawa kjut wa chitom, da pynche haroh u heiyatoh wa ka CM Mothers Scheme neibhah hadooh katni dang boon ki wym pu em pynpsiah pyrtuid hapoh kani ka Scheme.
U Lat ka jylla u C.H. Vijayashankar hawa klam kam u kongsan yaroh u yei man kyrpang ka jylla Meghalaya kawa kheiñkor bha ya ki kynthai wa kynthup nadooh i e jait, i yoh pateiñ ya ka spah ka phaw wei kamjooh hadien wa chong kurim u chynrang lai sah u cha yung kynthai.
Hawa klam hajrong kani ka Campaign, kyntu u ya ki paidbah wow wan ki chakhmat u chim kabu neibhah toh kawa da pynkhreh kyrpang neibynta yong ki khlem iwon iwon i su wa kynthup nadooh i pait bniah wei e sumaar.
Ong u i eh wa ka jylla Meghalaya maad ko toh i kjut Cancer, TB wa i roi u drugs, heiwa na u drugs leh ye u mih sei kjut HIV/AIDS.
Kamtæ kyntu u ya ka chnat yong i chait i khiah nadooh u Montri, u Commissioner, ki Doctor, kiwa kreh i chait i khiah deilang ki paidbah wow yakrehlang chirup hajrong wow pynsñiawthooh ya ki paidbah ya i chait i khiah.
Da ong u leh wa kiwa yoh kjut leh toh u mih ki chakhmat khnang yow yoh sumaar ki heipor wa biang, neibhah deiwa suki hi-eh nangjoor i chitom.
Wei kamwa kani ka Campaign u neh ko 15 sngi nadooh wa sdang ya ka ha ka 17 tarik wei hadien ka 2 tarik u bnai won khana u wa daw lum yukheiñ na waroh ki District ka jylla wei ya kiwa yoh u psiah ha ka Top-3 daw khut ya ki cha Raj Bhawan ha chirup u Montri Rongbah ka sorkar jylla, u Chief Secretary ka jylla, u Montri i chait i khiah wa kiwi neibynta u e burom ya ki Doctor wa ya waroh kiwa da yakrehlang yow pynjop ya kani ka Campaign.
Kamtæ yooluti wei kyrpaad u ya kiwa kreh ka West Jaiñtia Hills District wa toh u yakhun pynyoh naam wa nyngkong dooh khamtam wa kani toh ka thaaiñ u Montri ka chnat i chait i khiah ka sorkar jylla.
Discussion about this post