Jowai: Ka seiñ Meghalaya Peoples’ United Front (MPUF) da sñiaw phylla ko hajrong i klam tangdep u MLA ka 6-Khliehriat heiwa da ong u (Justine Dkhar) wa ka seiñ toh u thooh bniah ko chwa wow pynmih khubor hei yatoh wa ka MLA Scheme wei da kam u wa oo ym embor u wow pyllait ya ka Scheme wei emkaam wow phah (Proposal) chwa cha ka sorkar ryngkat wei lut i sep (estimate) wei ymtoh i kaamram yong oo wow pynkrehkaam ki Scheme.
Hei yatoh wa ini ka seiñ da ong ko wa yoosar wa ka scheme ymtoh ka yong u MLA tangwa ka yong ka Office u BDO deiwa beiñ ya oo (Justine) wa ymtip u wa katkam ki kyndon (guideline) yong ka scheme ong ko wa u BDO toh u wow pait ya ka Scheme lyngba u Nodal Officer u Deputy Commissioner wei hadien wa dadep pynbiang ya ki beneficiaries toh won i kaamram u MLA wow phah ya ki pyrtuid yong ki, hadien ini u BDO toh u e chwa u 50% wei hadien ynru bnai ki beneficiaries hap e ki ya ki UC (Utilisation Certificate) wa wow yoh ki waroh ka poisa (Second Installment).
“Tangwa yoo lakam wa uni u MLA (Justine Dkhar) ympu em puræ u ya ki kyndon ka SRWP neitæ i daw ymtip u” da ong ka MPUF.
Ka seiñ da ong ko wa lada u MLA ong u wa ymtoh i kaamram yong oo wow pait ya ka MLA Scheme, ini pynyoo wa ymtip u chaphang i kaamram yong oo neibhah wa katkam ki kyndon kani ka Scheme ong ko wa chwa wa u BDO u pyllait u ya ka Scheme neiliang u MLA toh u phah u ya ki pyrtuid yong ki beneficiaries wei u BDO ye u wow pdiang (approve) ya ki.
“Chooh chooh uni u MLA da ong u wa ka skur yong oo emkaam yarap, tæ weileh kiwa boon ym emkaam yarap ki mo?” Da kylli ka seiñ.
Heiyatoh won wa ki Civil Work neiliang yong ka seiñ da ong ko wa ymtip ko iyi iyi hei yatoh wa ka Work Order na ka office u BDO, tæ kammon uni u MLA da ong u wa ka Office u BDO dadep booh ko ya ka record.
Ka seiñ khaddooh pynkut ko deiwa kyntu ya u MLA wow puræ ya ki kyndon ka SRWP wei wow bichaar yaka RTI na u BDO wei da kyntu leh ya oo wow pynyoo u ya ki UC katkam wa kam u.
Discussion about this post