U Gavin M Mylliem, MLA ka Sohra Constituency hadien wa chah maham u haka HNLC kawa da ong wa toh u bahkhlieh u yei pyrchang ka sorkar wow khang ya ka MCCL, da pynche u yei long i man kani ka karkhana kawa da sih chwa chwa wow man u kam u MLA ha u 2018 wei kani ka karkhana toh kawa sdang u hiar nadooh u snem 2007 wei hanla kani ka karkhana em ko hapoh ka Shella Constituency, neiliang yong oo da klam u leh chaphang ini i kaam wot hapoh ka Assembly.
Yow sñiawthooh ki paidbah da khana u wa ya kani ka Mawmluh Cherra Cements Limited (MCCL) da tip nyngkong ya ka kam ka Assam Cements Limited wei da chimkti da ka sorkar yaka haka 20-05-1995 wei da pynyklla pyrtuid ka cha ka MCCL.
Da sdang ko wow pynmih khyndaw-bilat haka 15-11-1966 deiwa yahluti ka ACC Ltd heiwa da pynchna thymme yow pynheh pynsan yei bor kani ka karkhana deiwa wanrah ka sorkar da ka Reactivation Programme wei hadien wa pyndep yeini ha u snem 1991-92, kani ka karkhana da ye ko wow pynmih 1.75 lak ton i khyndaw-bilat ha ka chi snem deiwa pynemkaam da ka Wet Process.
Ha u snem 2004 da pynheh biang ya kani ka karkhana deiwa pynlut Rs. 84.95 klur iwa da booh thong wow pyndep ha u Naichiphaw u 2007 deiwa booh sa ka 600-TPD Dry Process Plant tangwa ini da sahteiñ i da 9 snem wei da ye u pyndep ha u Naikhynde 2016 wei ki daw wa slem em ki kiwa boon kam i wym ye ka sorkar wow pynlait yaka poisa heipor iwa da wanrah won yei ku i lut i sep wow leh yeini.
Da khana u wa nadooh u snem mang tyngka 1989-90 hadooh u 2006-07 kani ka karkhana toh kawa yoh nong wei ka wym em dap ram wei da ye ko u krehkaam khlem da paan kyrchaan na ka sorkar.
Tangwa ini waroh da kylla nadooh u snem 2007 neibhah ka Wet Process Plant toh kawa khlan sih wei neidaw wa da rim kini ki tiar ki taar, man ki leh kiwa khlan u baam bordiñ iwa da ktah yei yoh nong wei waroh ka poisa wa da pynlang ha ki snem wa da lai da hap wow pynlut ka wei i ye wow pynmih khyndaw-bilat leh sdang i wow hiar.
U Gavin da ong u leh wa nadooh wa khang ka NGT wow tih mooyong ha u snem 2014, da man ko i dawbah wa pynman ya ka MCCL wow dam syndon ko wow pynkrehkaam ya ka Wet Process Plant warim ha u Naisaphra 2024 neidaw wym em mooyong de.
Heiyatoh won waka Dry Process Plant kawa da ye u wai ha u 2016 kawa ye u pynmih 180000 MT chi snem iwa mut 15000 MT chibnai, tangwa ym ye u leh yeini neidaw wa ka MCCL da dap ram ko wei da ye u pynmih khyndaw-bilat du 25% na i bor yong ka wei yow lait naka ram toh u ye u pynmih 70% na i bor wa ye u leh.
I wan ka chlam COVID-19 da ktah chooh chooh ko ya kani ka karkhana ha u snem 2020 heiwa da sangeh i pynmih ya iwon iwon i khyndaw-bilat wei manda ieh ya ki kor khlem pynemkaam da sdang ki wow sih.
Kamtæ ka sorkar da em ko 3 tylli ki laad ki luti yow pynim biang ya kani ka karkhana heiwa iwa nyngong toh yow e poisa chooh chooh da ka sorkar yow chna pynthymme, iwa ar toh wow pynlai ya kani ka karkhana deilang wa ki karkhana ki bru samen wei iwa le toh yow khang noh ya kani ka karkhana deiwa su ya waroh kiwa kreh hapoh ka Voluntary Retirement Scheme (VRS) kamjooh waroh iwa dang sah i wym pu em dep su.
Lada e yarap poisa ka sorkar yow pynchna thymme ya kani ka karkhana, daw hap pynlut Rs. 188 klur tangwa da em leh ka poisa wym em su kani ka karkhana cha ki chnat sorkar, ki Supplier, ki Contractor kamjooh ka tulop kiwa kreh ko wei lada leh ka sorkar yeini waroh leh ym tikna wa kani ka karkhana daw ye ko wow yieñ hei bor yong ka hi. Da ong u leh wa ha ki 15 snem wa da lai, ka sorkar da pynlut ko Rs. 350 klur neibynta kani ka karkhana tangwa ym mih soh mih sla.
Heiyatoh won wow khut da kiwi ki karkhana ki bru samen wow krehlang yow pynlai ya kani ka karkhana da em le tylli wa wan chakhmat tangwa ym em mankaam i.
I laad wa khaddooh ya ka sorkar toh su noh da ka VRS ya kiwa kreh wei wow pynkhooid ya waroh iwa dang sah khlem su wei kiwa kreh ka MCCL da thoh ki leh cha kiwa pynlai yaka MCCL yow yaklam noh waka sorkar kammon u pynkrehkaam ya kani ka VRS.
Kamtæ u Gavin da ong u wow pynbaad wa ka sorkar ym em leh ko iyi iyi toh iwa bakla wei ymtoh leh iwa suk wow chim yei rai wei sñiawskem u wa dei stat ka sorkar daw chim ko yei rai iwa daw man katkam wa kwah kiwa kreh, kiwa chong chnong waka jylla waroh kawi.
Discussion about this post