Kamwa 300 tam ki bru kiwa wan daka lieñsuiñ ha Silchar Airport, Assam ha kani ka 21 tarik da yut ki khlem da leh ya ka COVID-19 Test kawa ym hoi u dam u leh katkam ki kyndon ka sorkar jylla.
Ka sorkar Assam da phah ko wa ym hoi u dam wow leh ya ka Rapid Antigen Test (RAT) wa RT-PCR ya kitu kiwa wan da ka lieñsuiñ. Tangwa neidaw wa ka Silchar Airport khian ware ko, yei Test da leh ha ka Tikol Model Hospital kawa em hajan ka Airport.
Ha ka 21 tarik da em kamwa 690 ngut kiwa hiar ha Silchar Airport wei da em na ki kiwa lai luti won cha kiwi ki jylla ka thaaiñ mihsngi wei da pynlait ya ki wei da em 189 ngut kiwa chim ya ka Test heiwa na kini da em 6 ngut kiwa yoh ya u khñiang khlam tangwa kiwi kiwa em kamwa 385 ngut kiwa da yut ki khlem da chim ya ka Test hadien wa tip ki wa hap su T. 500 kam ka bai Test..
Neiliang ki bor sorkar dang pynman ki yaka takit yow chem kammon lait kini ki bru wow yut tangwa kiwa sakhi kiwa yoo yeiwa jia da ong ki wa kini kiwa yut toh kiwa ym kwah wow chah Test kamtæ da yut ki na i thaw Test.
Ya kini ki bru toh kiwa kit da ka Bus na Airport wei em leh kiwa chah wow lai da ka kari yong ki na Airport cha i thaw Test deiwa yoh bor na ka sorkar deiwa e lut ya ka yutip yong uwa yah kari wa u tre kari.
Ki pulit dang booddien ki ya kini kiwa yut heiwa da em lut ki phone number wa ki thaw sah yong ki yow pynchitom ya ki katkam ka aiñ.