Hadien wa yut ki MLA ini wa dep, da yut won sa ki 10 ngut na ki 11 ngut ki MDC ka Congress ha GHADC kiwa da psiah cha ka Trinamool Congress ha ka 9 tarik ha ka yalang wa pynman da uwa yahkhmat ka Trinamool, u Dr. Mukul Sangma ha Resubelpara, North Garo Hills District.
Ki MDC kiwa da yut toh u Cherak W Momin (Kharkutta), Sonjoy Koch (Betasing), Stevie M Marak (Boldamgre), Agassi R Marak (Balachanda), Lahitson M Sangma (Samandagre), Nehru D Sangma (Amongpara), ka kurim u Zenith Sangma ka Sadhiarani M Sangma (Dengnakpara), Alphonsus R Marak (Williamnagar), Rinaldo K Sangma (Rongrong) wa u Ferdinand Shira (Damas).
Uwa wiar toh u MDA ka Shyamnagar, u Habibuz Zaman u wym emlang neidaw wa em u cha baar tangwa oo leh da dep u wow psiah cha ka Trinamool iwa mut wa waroh ki MDC ka Congress da yut ki.
U Dr. Mukul da ong u wa kiwa yahkhmat ka Congress da pynrem chynnam ki deiwa pynyieñ kyrtong da kiwa tlot heithaw kiwa emlaad wow jop wei yeini da yoo ha u 2018 kawa da toh wow jop tangwa da jied kyrtong da ki wym jop.
Da beiñ u leh ya ki seiñ ri-loom kiwa da beiñ ya ka BJP tangwa krehlang won ki pyn wa ki bru wa da beiñ ki.
Katkam wa ong u Dr. Mukul, du ka All India Trinamool Congress waka Mamata Banerjee kawa da pynyoo wa ye u leh pyrchah ya ka BJP deiwa jop ya ka BJP ha uni u snem ha West Bengal.
