Ka Mang Hai Ryum Higher Secondary School, Amlarem, West Jaiñtia Hills da lehkmen ko ya ka Silver Jubilee (2000–2025) ha ka 17 tarik uni u bnai deiwa chimbynta u Lahkmen Rymbui, Montri ka chnat puræ puthi kam u kongsan chirup ki ar ngut ki MDC, u Jamshaphrang Pohtam wa u Medling M. Swer deilang ka Deibor Patrecia Lytan, In-Charge Sub-Divisional School Education Officer (SDSEO), Amlarem Sub-Division wa u Dr. D. Lyngdoh, Block Development Officer (BDO), Amlarem C&RD Block wa kiwi de.
Ha kani ka yalang da kynmoo warom leh ya ka kawa sdang ya kani ka skur, ka (L) Aiom Pyngngad Pamthied wei da wai leh ya u moo sahnaam (Commemorative Silver Jubilee Stone Tablet) ya ini dap 25 snem ka skur wei da pynbood sa i ah Cake.
U Lahkmen hawa e yei klam da yaroh u yei lai luti ka Mang Hai Ryum Higher Secondary School kawa em yei rai kut wei dait lamieñ trait hadooh wa poi cha ka thong deiwa jop ya chiboon i eh. Da yaroh u leh ya ka yung ka sem ka skur yei kreh chitom deiwa ong wa lada 10% na ki 55,000 ngut kiwa sikai skur ka Meghalaya em ki kam ini i jooh i mynsien wow pyrkhat jngia, daw kylla dur ki kaam puræ puthi hapoh ka jylla.
Da klam u leh yei thmu ka sorkar kattæ wow pynthymme noh yei rukom kheiñ kyrdan ya kiwa sikai deiwa booh da u ar tylli donhi kitæ ka Grant-in-Aid wa Government Salary wei da pyntip u leh wa daw chim ka rai wa khaddooh chwa u December uni u snem.
Da pysñiaw u leh yei sñiawsih wa duna kiwa lai cha ki skur sorkar wa em ha Amlarem Sub-Division, kamtæ da kyntu ya kiwa yahkhmat chnong wow chimkhi ki yeini yow wanrah yei kylla wei pynkhlan ya ki thaw puræ wa em ha ki chnong ki thaw.
Ha kani ka sngi da pynbna u leh yei yarap cha kani ka skur kawa ₹15 lak hapoh ka Chief Minister’s Special Development Fund (CMSDF), neitæ ka ₹10 lak yow pynchna pynmiat wa ar tylli ki kari Maruti Eeco Van yow kit ya ki khynnah skur. Da kular u leh wa ya ka Work Order daw saam manda wan u Chief Minister cha Amlarem ha ka 12 tarik u November 2025 kam chibynta i lehkmen yei dap 50 snem ka Amlarem Sub-Division.
Discussion about this post