Ka sorkar India ynne da soi soskular ko wa ka New Development Bank (NDB) wow chim ya ka ram wa $1 Billion ($1,000 million) neibynta ka ‘Supporting India’s economic recovery from COVID-19’ namo wow yarap ya i yoh i la ka ri hadien wa wan ka khlam COVID-19 wow yarap kyrchaan ya ki kreh ha ki Natural Resource Management (NRM) wa i yoh kreh ki bru ha ki thaw palat sor hapoh ka Mahatma Gandhi National Rural Employment Guarantee Scheme (MGNREGS).
I wanrah ya ka Lockdown wa kiwi ki kyndon wow khang yei poor ka khlam COVID-19, da ktah bha i ya ka ri liang wanang wei khamtam hei yoh khih yoh kreh ki bru ha ki thaaiñ palatsor.
Da kani ka ram daw yarap wow pynchna ya ki thaw wa yatoh wa ka NRM wei wow e kreh ya kiwa khih mylla kiwa da liwan yung wei kiwa da dooh kreh neidaw kani ka khlam COVID-19.
Ya kani ka soskular da soi da u Baldeo Purushartha, Joint Secretary, Department of Economic Affairs, Ministry of Finance, neibynta ka sorkar India wa u Xian Zhu, Vice President, Chief Operations Officer neiliang ka NDB.
Ka NDB toh kawa da sdang da ki sorkar ki ri wa em hapoh ka BRICS Countries (Brazil, the Russian Federation, India, China wa South Africa) hadien ka soskular wa da soi ha ka 15 Naiynniaw 2014 neibynta wow e yarap ya ki ri wa em hapoh kani ka satri wa kiwi ki ri.
Kani ka ram wa $1 Billion na ka NDB i por (Tenor) yong ka toh neibynta 30 snem wei ye leh u pynyinsur yei por hadooh 5 snem.
