Ka yaaw yadai yathied wa tip kam ka Buyers and Sellers Meet ha ka sien wa le da pynman ka da yung krehkaam u Deputy Commissioner ka West Jaiñtia Hills District hapoh ka National Rural Livelihood Mission (NRLM), chirup i yakrehlang ki chnat krehkaam sorkar waphær waphær ka District hajrong ka thong u pynkupbor ya ki warep, kiwa seiñ khih yong ki hi ha ka District, wei da sdang ka ha ka 5 tarik ha madan Jrisaleiñ Chutwakhu, Jowai.
Ya kani ka yaaw u pteiñ hadooh ka 6 tarik deiwa wan em kamwa 100 tylli ki dukan namo ki Stall waphær waphær wa kynthup nadooh i dai ya ki mar rep, ki baam wa pynmih hei rukom wa boonjait, neitæ ki tiar, ki that wa pna chna wei thaiñ hi, i baam i dih waphær wa pna chet hi, neitæ ki thaw pynche wa yatoh wa ki laiñ puræ puthi, kamjooh ki laad yoh khih yoh kreh.
Chooh chooh da em leh i pynyoo yei sap tem sap rwai, i chaad tynre wa kiwi wei ym em chim bai psiah ya ki paidbah wa wan.
Ya kani ka yaaw ya dai ya thied da wan wow wai da u Wailadmiki Shylla, Montri sorkar uwa man leh u MLA ka Jowai hei emlang u DC ka West Jaiñtia Hills District, u Abhinav Kumar Singh wa ki sahep sorkar na ki chnat krehkaam waphær.
U Wailadmiki da ong u wa kani ka Buyers & Sellers Meet toh ka rynsan wa kongsan tam wow pynyoh yaaw ya ki warep ka thaaiñ yow pynyoo ki yei kreh chitom yong ki wei i ye ki wow pynmih ya ki mar wa rap phær, najrong wow man ka laad wow yachem wei wow ya saam buit kylliang.
Da kyntu haroh u ya waroh kiwa chimbynta wow em ki i sñiaw kyllooid mynsien neibynta u yaklam ya khana wei yachem yumut para wa dai kamjooh leh wa kiwa wan thied wan pet.
Yooluti u leh wa kani ka Buyers & Sellers Meet u nang ku ko na ki snem cha ki snem wei u yarap pynku ko leh yei kamai kajih wa i yoh i la ki paidbah ka District.
Neiliang u DC ka District hawa pynsñiaw u ya ka thong yong kani ka yaaw yadai yathied, da ong haroh u wym em mut wow kut ko du kat kani ka yaaw tangwa man haroh ko ka rynsan wa yatoh hajrong kammon u pynku ya ki warep, kiwa seiñ khih yong idæ, ki Self Help Group wa kiwi.
Kiwi won wa e i klam kynthup ya ka B.Blah, Additional Deputy Commissioner wa Project Direct DRDA & Nodal Officer DMMU, WJHD, u Shanlang Lyngdoh, COO-LP, MSRLS-SMMU wa u Lambor Suchen, Skill Development Officer WJHD.
Discussion about this post