Ka Village Employment Council (VEC) Mihmyntdu kawa haap hapoh ka Thadlaskeiñ C&RD Block, West Jaiñtia Hills da ye ko u wai paidbah yaki 24 tylli ki Scheme wa da dep pynkreh hapoh ka chnong lyngba ka Scheme MGNREGA namo ka kreh 100 sngi yong u snem 2021-2022.
Kini ki 24 tylli ki Scheme wa da dep pynkreh hapoh ka chnong toh yong u snem 2021-2022 wei i lut ha waroh kini ki kreh da kynjoh ko kamwa T. 1.88 klur.
Neitæ ki jait kreh wada pynkreh haki dong waphær wapher ka chnong Mihmyntdu, kynthup ki phylloh syiar, phylloh sniang, ki luti lai kjat, ki sarok, ki umbaam umdih, ki kynroh wa kiwi kiwi.
Ha kani ka sngi da wan wow wai ya kini ki Scheme wa da dep kreh da u MLA ka thaaiñ u Wailadmiki Shylla waka BDO ka Thadlaskeiñ Block, ka B. Blah hei sakhi lang u Dolloi ka Elaka Jowai, u P. Kynjing, u O. Lamin MDC ka JHADC, u Waheh Chnong ka Mihmyntdu, u A. Phawa wa kiwi wa chah khut sñiawbha.
Ka BDO hei klam yong ka da yaroh ko yaka VEC Mihmyntdu neibhah napyrdi ki 116 tylli ki VEC wa em hapoh Thadlaskeiñ Block niar u em ki VEC wa ye u kreh kam ka Mihmyntdu wei wot hadooh u pynbiang ki yukheiñ yudiah.
Da khana haroh ko wa em ki VEC hanla du kajiak i kreh leh wym ye ki u pyndep. Neite em leh ki chnong du neidaw wom ya sñiawthooh yumut, dooh sepai lut ki ya waroh i myntoi wa toh u yoh ka chnong.
Neite i daw ong ko wa emkaam bha yaki bor chnong u yakrehlang wei kreh bha ki, neibhah lada ye u kreh bha i myntoi leh u nang yoh chooh chooh ka chnong.
Neiliang u Wailadmiki Shylla won ong u, kamwa hapoh ka yung ka sem lym yatoh yumut ka bei u pa waki khon wym man ka yung wa miat wa bha ne lai bait lai ryntih, i jooh hi haka Scheme 100 sngi wa wan naka sorkar bei leh, neibhah waka sorkar jylla leh em ko ka bynta kamwa 25%, neite i daw emkaam i yakrehlang nadooh ka sorkar, ki chnat sorkar ki waheh chnong waki paidbah.
E haroh u i yaroh wa khroo yaka VEC Mihmyntdu wa man ko ka nongmuna ya kiwi tawan ki chnong wot hawa da man ka chnong wa heh wa kmai.
