“Nadooh wa man kam u MLA ka Khliehriat wa u Montri ha ka sorkar MDA, da pyrchang katwa ye wow pynpoi ya i hok yong ki paidbah cha ki khamtam katkam wa emkaam ki neibhah ini toh i kaamram yong i ki MLA,” da ong u MLA ka Khliehriat uwa man leh u Montri ka sorkar jylla, u Kyrmen Shylla ynne ka sngi hawa yaklam wa kiwa pathai khubor.
Chooh chooh da ong u wa sñiawsuk ha ini i lai luti dei maya u Montri Rangbah, u President ka Party, wa kiwi ki Montri wa ki MLA da pyrchang wow wanrah ya ki kaam pynroi heiwa katni dang em ki kreh (Project) wa dang kreh wei da em kiwa dadep wei dang em kiwa da pynkhreh wei kiwa da tyrwa yow pynkreh.
Heijooh i por da ong u, “Ha i lai luti yong nga yoo O wa ki paidbah ka Khliehriat Constituency em ki i maya ya nga wei pynyoo ki hadooh katwon sñiawsuk ki hawa em chirup chirup”.
U Montri da ong u wa kamwa man ha ka Election 2018 ki paidbah da pynjop ki ya oo da boon tylli ki Vote wei ngait skem wa u wa ha kani ka Election 2023 dei maya ki paidbah ka Constituency u pynjop biang ki ya oo khnang wow ye chooh u wow chakri ya ki paidbah.
Da ngait skem u wa ki paidbah wow sñiawthooh ki hawa jied ya kiwa mihkhmat na waroh 60 tylli ki Constituency ka jylla neibhah hawa yakhun u kyrtong em u ka thong wei ki paidbah em ki i angnood neibynta yong ki neibhah emkaam wow pynchong yurim bha chwa wow jied khnang wow lait u silet hadien habood.
