Ynne ka sngi, u Deputy Commissioner uwa man leh u Chairman ka District Selection Committee ka West Jaiñtia Hills, u Abhinav Kumar Singh da pynche u wa katkam wa man kattæ em du 255 tylli ki kreh wa lait hapoh i pait ka DSC wei ya kini ki kreh u pyndap hapoh yong uni hi u snem.
U Abhinav da kyntait u yeiwa kam ka HITO wa lait ki kreh hadooh 560 tylli deiwa pynche wa katkam wa man hadooh ka 16 tarik uni u bnai heipor wa klam u MLA ka Jowai, u Wailadmiki Shylla wa kiwa pathai khubor em hadooh 151 tylli ki kreh wa da lait.
U DC da pyntip won u wa ha ka 26 tarik uni u bnai da khut ya ka yalang wa ki sahep ki chnat waphær waphær heiwa da chem wa dang em ki kreh wa thylli kiwa kynthup ya 21 tylli ki LDA wa 83 tylli ki Grade IV wa Grade III Post wei waroh ki kreh deiwa kheiñlang wa ki 151 tylli wa thylli da em ki 255 tylli ki kreh wa lait hapoh ka West Jaiñtia Hills.
Chooh chooh da pyntip ki 49 tylli ki kreh LDA dadep thung ya ki chirup wa ki 4 tylli ki kreh Boatmen.
Da pyntip u leh wa ka Interview neibynta ki 16 tylli ki kreh wa kynthup 11 tylli ki Sericulture Demonstrator, 4 tylli ki Gram Sevak wa 1 ka Gram Sevika daw pynman noh ha ki ar tayaaw wow wan.
Heiyatoh wa i kam ki seiñ HITO wa em palat 500 tam ki kreh wa lait, u DC da pynche u wa kitæ ki kreh kynthup ki ya ki Muster Roll ha ki chnat waphær waphær, ki Warden, ki Pharmacist wa kiwi ki kreh kiwa ymtoh de hapoh i pait ka DSC tangwa lai ki da ka Promotion, ka MPSC wa kiwi.
Hawa kylli kat mynnu u pyndap noh ya 255 tylli ki kreh wa lait, u DC da pyntip u wa ha ki sngi wow wan daw pynwandur ya ki por wei wow pyndap noh ya ki hapoh u Naikhynde/Naichiphaw yong uni u snem.
Discussion about this post