Ka District Level Interschool Athletic Meet 2025 wa le sngi yong ka West Jaiñtia Hills District wa pynman daka yung krehkaam u District Sports Officer, West Jaiñtia Hills chirup wa ka West Jaiñtia District Sports Association da sdang ya ka ynne ka sngi ha madan Kiang Nangbah Stadium, Dongmihsngi Ladthadlaboh, Jowai.
Ya kani ka lympung yalehke da wan wow wai da ka kongsan, ka A.P. Syiem kawa man ka Joint Director yong ka School Education and Literacy ka sorkar jylla, hei emlang kiwa sikai, ki khynnah skur wa kiwi, wei ki skur wa wan chimbynta em ki hadooh kamwa 28 tylli.
Ka A.P. Syiem hawa e i klam da ong ko wa sñiawsuk bha ko wow embynta lang wa ki khynnah skur heiwon iwon i jait lehkmen la hei yatoh i puræ puthi, i lehke sports wa kiwi, kamtæ heiyatoh wa ynne ka sngi, da pynehbok ko ya waroh ki khynnah (Athletes) wa chimbynta ha ki yakob waphær waphær.
“Waroh tip i wa ka sports em ko ka bynta wa khroo bha hei rukom im yong ki khynnah khynroo khyllood khamtam ha kiwa em yei sap, wei kani man leh kawi ka rynsan wa elaad ya kiwa emsap wow yoh ki u pynyoo rong” da ong ka A.P. Syiem.
Heijooh i por sñiawkmen ko leh wa heiyatoh wa i puræ puthi, ka District West Jaiñtia ha uni u snem da ku i deiwa sakhi ya ka result SSLC ka MBOSE wa pynbna ini wa dep, kamtæ yooluti ko leh wa heiyatoh wa ka sports leh u ye ko wow lehbha kamwa leh ha ka Meghalaya Games ini wa dep.
Yooluti haroh ko wa ha uni u snem manda lai chimbynta ki cha ka State Level Athletic Meet u rah naam rah burom ya ka District dei wow ye u lehbha kamjooh dei wow krehchitom.
Da pynrap ko deiwa ong, i lehke sports ym mut i du kat wow jop næ rem tang iwa emkaam tam toh i em yei mynsiem ka’it wow chimbynta.
Lyngba kani ka District Level Interschool Athletic Meet, ngait skhem ko leh wa ki para wa chimbynta u man kiwa ya burom mar kylliang, u ya e mynsien kylliang wei ya paan yumut kylliang.
Ha kani ka sngi da yoh leh i klam na u K. Passah uwa man u District Sport Officer wa na u Patrick Lamare u Vice President ka WJDSA.
Ki jait lehke kynthup ki nadooh ki yaphet pyllah hei jngai waphær waphær deiwa bhah katkam i rta, neitæ ka long jump, high jump, javelin throw wa kiwi.
Discussion about this post