Heiyatoh wa i awri awra wa da jia ha West Garo Hills hapyrdi kiwa kyrchaan ka TMC wa NPP iwa da jia ha ka chnong Charbatapara, Phulbari ha kani ka 7 tarik, ki pulit da kem ya 31 ngut ki bru kiwa da emkti ha ini i kaam pyn ha ka sngi wa bood.
Kam wow pynkynmoo wa katkam wa pyntip u District Election Officer ka West Garo Hills, ini da jia i hadien wa ki bru ka TMC da dat da sngoh ki ya ka kari u MDC ka NPP, u Habibur Zaman uwa da lai luti na kani ka chnong iwa da wanrah ya ini i awri.
Ka FIR won wa da e pyrchah ya u Zaman da ong wa ki bru wa yahkhmat u Zaman da kawang moo ki ya i yung u Nozim Hussain heiwa da takha 4 ngut.
Neiliang ki pulit ka West Garo Hills da phah ko ya 125 ngut ki bru kiwa da khlan u pynmih kulmar wow wan ki hakhmat ka yung bichaar ynnin ka sngi yow soi ki ya ka Bond wym pynmih kulmar ki ha kini ki por wa em ka Election.
Ha iwi won i liang, da pynjoor ya ki bor ka aiñ wei da pynman leh ya ka Flag March ha kini ki thaw heiwa da lai pait leh ya kani ka thaaiñ da u Sub-Divisional Officer ka Dadenggre Civil Sub-Division, deilang ki pulit ki BSF wa CRPF yow yachem yaklam leh wa ki bru wa sah ha kini ki thaw.
Puræ leh: Mih ka awri awra hapyrdi kiwa kyrchaan ka TMC wa NPP mynsoo uwi
