Ka chnat Public Health Engineering yong ka jylla da booh thong ko wow pynpoi ya ka umkor hadooh tyngkong yung ha ki thaw nongkyndong lyngba ka Jal Jeevan Mission hadooh 34.59% hadooh wa kut uni u bnai.
U MLA ka Congress na Nongpoh, u Mayralborn Syiem ynne ka sngi da wanrah u yei kylli hapoh ka Yung Dorbar Chna Aiñ hajrong i pynkrehkaam ya ka JJM wow pynpoi um hadooh ha yung ha ki thaw nongkyndong, heiwa da kylli leh yei em ki District kiwa slem wow pynkrehkaam ya kani ka Scheme wa ka chnat da thmu ko wow pyndep hapoh u snem 2022, chwa ya ka thong wa da booh da ka sorkar India.
Hawa jubab yeiwa kylli, u Montri wa pait ya ka PHE, u Renikton L Tongkhar da kubur u wa em ki kattu katni ki District wa slem u pynkrehkaam ya ka JJM, deiwa pyntip leh wa i daw toh wa duna ki wakreh wei wym ye u pyndap ya ki Pipe um ha i por wa biang.
Da pyntip u wa yow pyndap ya ini i duna, neiliang ka chnat da thung kreh ko sa 45 ngut ki Engineer, katwa hawa yatoh wa i wym ye u pynbiang ya ki Pipe um, da pyntip u wa neiliang ka sorkar da e bor ko yaka chnat wow thied ya ki Pipe um na kiwei won ki Company najrong waka Company wa da dep ya soi soskular.
Hawa jubab chooh chooh, u Montri da pyntip u wa i mang poisa na ka JJM ha ka jylla Meghalaya toh T. 1190.64 klur. Ha i jooh i por da pyntip u leh wa neibynta i kreh wa da dep, ya ka poisa da dep wow pynlait khamtam neibynta wow su ya ki Contractor.
Hawa yatoh wa ki chnong kiwa em ha Nongpoh, kiwa da chah pyndam na ka Census Town ha ka KHADC, neiliang u Renikton da ong u wa ka chnat ka dang bichaar ko yei yoh bhah na ka JJM.
