Ka sorkar Meghalaya da pyndep ko yei thung kreh ya 400 ngut ki Doctor wa kynthup ya ki Specialist iwa da leh du chi bnai hadien wa da pynkrehkaam ka sorkar ya ka Medical Services Recruitment Board (MMSRB).
Kam wow pynkynmoo wa ini wa dep ka sorkar da dep ko wow mynjur ya ka MMSRB yow pynsmat u thung kreh Doctor kiwa em boon tylli wa lait wei lada yang ya ka Meghalaya Public Service Commission (MPSC) toh kawa chimpor bha wow leh yei kaam kamtæ deiwa pynkrehkaam da ka MMSRB da ye wow thung kreh wut-wut yow pyndap yow ye u chakri paidbah.
Ya kini ki Doctor wa dang thung kreh da yachem leh ya ki da u Montri Rangbah ka jylla, u Conrad Sangma ha ka 17 tarik uniu bnai deiwa emlang leh u Montri ka chnat i Chait i Khiah, u James Sangma.
Ha kani ka jooh ka yalang wa da pynman ha Yojana Bhavan, Shillong da wai leh ya 22 tylli ki AYUSH Bharat Health & Wellness Centre hapoh ka National AYUSH Mission.
Neiliang u James da ong u wa i khaddooh wa da khut thung kreh Doctor toh ha u snem 2016 wei hadien ini ym ye wow thung uwi leh u Doctor iwa da ktah wei pyntkoh bha ya ka kaam e sumaar hapoh ka jylla.
Chooh chooh da khana u wa kini ki Doctor wa da thung toh ki Allopathic wa Ayush.
Neiliang u Conrad da yaklam u leh wa kini ki 400 ngut ki Doctor deiwa ong u leh wa deiwa yoh u wai sa kini ki 22 tylli ki AYUSH Health & Wellness Centre daw pynkhlan ko yei e sumaar hapoh ka jylla wei kini toh kiwa da pynku kyrdan na ki Dispensary wa ki Sub Health Centre yow man noh kam ki Health & Wellness Centre heiwa da thung leh ya 22 ngut ki AYUSH Doctor ki wow man leh kam ki Community Health Officer ki wow pynlai ya kini ki thaw sumaar.
Puræ leh: Mynjur ka sorkar yaka MMSRB neibynta wow thung ya ki kaam Doctor wa lait
