U Montri Rangbah ka jylla, u Conrad Sangma da pynksan u yei pynlut ka sorkar hadooh T. 250 klur neibynta wow thung ya ki Consultant deiwa pynche wa kini ki Consultant toh wa da hap thung hawa pynkrehkaam ya ki kreh wa man kam ki Externally Aided Project (EAP) wa ki kreh yong ki chnat sorkar pyrdi.
Ka sorkar da dep thung ko 161 ngut ki Consultant, wei hajrong ini u Conrad da ong u wa hawa pynkreh ya ka PMGSY, Smart City Project wa kiwi de ki kreh da em ki kyndon wa hap u thung ya ki Consultant wei ym chah khlem thung ya ki kamtæ ym em laad de da iwi.
Da pyntip u leh wa ka T. 250 klur neibynta ki Consultant toh kawa ha ki 5 snem iwa mut T. 50 klur chi snem wa T. 20 lak chi bnai iwa pynlut da ki chnat wa pynkreh ya kini ki kreh.
Chooh chooh da ong u wa kini ki Consultant toh kiwa da thung neibynta ki kreh wa dapoi T. 16,000 klur katkam ki kyndon ki chnat ka sorkar pyrdi kamjooh ki EAP. Na kani, palat T. 12,000 klur toh ki kreh wa haap hapoh ki EAP, T. 1,000 klur toh neibynta ki Smart Town Project wa T. 3,000 klur won yong ka PMGSY wa kiwi de.
Kamtæ da ong u wa i lut i sep toh kiwa wan na ki EAP wei ymtoh iwa da sai na ka poisa ka sorkar wei kini ki kreh leh toh kiwa da booh bhah chwa ka poisa neibynta kiwa man kam ki Consultancy deiwa kheiñ 5% na ka poisa wa da pynkreh.