Ynne ka sngi da pynman ya ar tylli ki yalehke kam chibynta yong ka lympung 4th T20 Cricket Knock-Out Tournament wa da pynlai da ka Sports Social and Cultural Club, Ummulong.
Ha ka yalehke wa nyngkong, ka Lomiongwar CC da jop ko ya ka Lumshnong Block CC da 2 Wicket. Ya ka kylla-khlem da jop da ka Loomiongwar wei da jied ko wow bol nyngkong heiwa ka Lumshnong Block da ye ko u kamai 148/10 naki 20 Over, heiwa da kamai Run boon dooh toh u Lukas Syngkor uwa da yoh 36 Run.
Neiliang kiwa kawang bol ka Loomiongwar, u Samitre Laloo da yoh u 4 Wicket katwa u Beckham Laloo wa u Iatha Chyrmang da yoh ki mar 2 Wicket.
Hawa kdong ya ka thong, ka Loomiongwar da jop ko du hapoh ka 17.2 Over, heiwa uwa kamai Run boon dooh toh u Beckham Laloo da yoh u 43 Run wa u Shoristar Suna wa u Chanlang Lypon 27 Run, katwa na kiwa kawang bol ka Lumshnong Block, u Rajen Dkhar wa u Jimmy Nongtdu da yoh ki mar 2 Wicket.
Yei naam Man of the Match ha kani ka yalehke toh u Beckham Laloo.
Ha ka yalehke wa ar ka Unknown XI da jop ko ya ka 6-AM CC da 7 Wicket. Ya ka kylla-khlem da jop da ka Unknown XI wei da jied ko wow bol nyngkong heiwa ka 6-AM da ye ko u kamai 111/9 na ki 20 Over. Uwa kamai Run boon dooh toh u Ricky Donald Shullai (48 Run).
Neiliang kiwa kawang bol ka Unknown XI, u Peter Nongtdu da yoh u 4 Wicket, u Wonderful Dkhar da yoh u 3 Wicket.
Hawa kdong yaka thong, ka Unknown XI da jop ko du hapoh ka 16 Over, heiwa uwa kamai Run boon dooh toh u Obadaia Bareh uwa da yoh u 54 Run, katwa na kiwa kawang bol ka 6-AM, u Mouldyson Ryngkhlem da yoh u 1 Wicket.
Ya i naam Man of the Match ha kani ka yalehke wa ar toh u Peter Nongtdu.
Mynstep ka sngi ka yalehke u man ko hapyrdi ka Loomsoiung waka Dame XI hei por 9:00 waje i step.
Discussion about this post