Shillong: Ka sorkar jylla ynne ka sngi da rai ko wow phah maap 50% ka bai skur neibynta ki le bnai, wa kynthup ya u April, May, June; ini i rai yong ka sorkar toh yow pynstiñ ya ki manyung kiwa dooh wa duk kiwa da chah ktah na i khang chnong næ ka Lockdown.
Hawa klam wa ki laad pathai khubor, u Symbood Montri Rangbah ka jylla, u Prestone Tynsong da ong u wa ka sorkar daw pynmih noh ko ya i pynbna ya ki skur kiwa haap hapoh i pait lang ka sorkar, wa kynthup ya ki Govt. Aided School, ki Deficit School wa ki Deficit Pattern School kiwa toh u pynduna 50% ka bai skur.
Ka sorkar jylla da phah khang noh ko ya waroh ki skur wa ki thaw puræ nadooh ka 17 u Wisu (March) hadooh katni, u Prestone da ong u wa ha kini ki le bnai ka sorkar da yoh ko yei ood naki bei ki pa wei kamjooh i e yumut na ki seiñbhalang waphær waphær, wei hadien wa da bichaar bniah, ynne ka sngi ka chnat puræ puthi ka jylla da wanrah ko ya kani ka phang yow pynstiñ noh yaka bai skur nei chah ktah haka Lockdown.
Hawa yatoh waki skur yong ki bru samen, ki seiñ niam næ ki seiñ krehmon sñiawbha, u Prestone da ong u wa ka sorkar daw pynmih ko da ka hukum wa ym toh u phah su ya kiwi kiwa toh u su neibynta ki 3 bnai (March, April, May) laitnoh du ka Tuition Fee. Da ong leh wa ka sorkar da e yumut ko yaka chnat puræ puthi wow yaklam wa kini ki skur ki wym toh i pait daka sorkar wei lada ye wow pynduna leh ya ka Tuition Fees da 50% khamtam neibynta kiwa wan na ki manyung kiwa duna hei yoh i kot.
Da ong chooh chooh wa neibynta kitu kiwa da dep wow chim chwa yaka bai skur, ka chnat puræ puthi yong ka jylla daw phah ko yaki skur wow kheiñ næ pynbait noh neibynta kiwi won ki bnai wow wan.
Hawa kylli, u Montri da ong wa ka sorkar ym pu chim ko ya kawon kawon ka rai hawa yatoh wa i wai noh yaki skur ha ka jylla, deiwa booh chwa ya i chait i khiah ki khynnah hakhmat.