Shillong: Ka sorkar jylla da pynbna ko wa kitu kiwa chong chnong kiwa liwan na baar jylla u hap su noh ki yaka bai luti na Guwahati wow lai cha ki District wa sah ki, tangwa ya ki kari u pynbiang bait da ka sorkar.
Hawa klam ynne ka sngi, u Symbood Myntri Rangbah ka jylla, u Prestong Tynsong da ong u wa ka sorkar kamwa da rai nachwa daw pynkut yei lai choo mynkna ya kiwa chong chnong na Guwahati nadooh ka 10 tarik uni u bnai, wei kitu kiwa liwan hadien ka 10 tarik daw hap su hi noh ki yaka bai kari hadooh ki Quarantine Centre ha ki District waphær waphær yong ka jylla.
Hawa kylli, u Prestone da ong u wa deiwa kheiñ yei em kiwa liwan cha ka jylla da boon bha hawa nujor wa kiwa da Register wa ka sorkar, tangwa neidaw waka sorkar da rai ko wow lai choo ya waroh kiwa chong chnong hadooh ka 10 tarik, u pteiñ wow pynbiang kari wow lai choo na Guwahati. Chooh chooh da ong wa hanla kiwa chong chnong hap ki wow su hi, tangwa ki kyndon wa hap ki wow pyndep u man bait ki i jooh kamwa da phah da ka sorkar.
Ha i jooh i por, u Symbood Montri Rangbah da pyntip u wa hadooh ynne ka sngi da em 13,990 ngut kiwa chong chnong kiwa da liwan waroh cha ka jylla.
Ha iwi i liang, u Prestone da pyntip u leh wa ka sorkar da dep ko wow phah ya ki Standard Operating Procedures (SOP) cha waroh kiwa yahkhmat niam, tangwa da ong u wa ka sorkar daw khut biang ko yaka yalang waki seiñ niam kiwa em ha ka jylla mynstep ka sngi yow lait na iwon iwon i sñiaw yaphær hachwa wow wai biang ya ki thaw mane Blai.