Kam chibytnta wow e yarap cha ki manyung da ki mrad ri, neiliang u Symbood Montri Rangbah ka jylla, u Prestone Tynsong ynne ka sngi da saam u da ki khon sniang hapoh ka Rural Backyard Piggery Scheme hapoh ka National Livestock Mission ha ka yalang wa pynman ha Tynring, East Khasi Hills District.
Hawa e yei klam, u Prestone Tynsong da yaroh u ya ka chnat Animal Husbandry & Veterinary Department wa da warah ko kam kani ka Scheme ka wow yarap ya kiwa dooh na kiwa dooh dooh yow yarap pynku yei khih i khan ki. Da khana u wa hapoh kani ka Scheme daw saam 3 tylli ki khon sniang kynthai wa uwi u khon sniang chynrang dei mynkna yow ri u psan wei wow pynkha khon cha 500 ngut kiwa yoh myntoi hapoh ka Mawryngkneng Constituency.
Da khana u leh wa lada yap kini ki khon sniang hapoh chi bnai hadien wa yoh, daw e ka sorkar da kiwi won wei da kyntu u leh wow sumaar bha ya kini ki khon sniang wei wow lai pynyoo Doctor dei langær yow lait u yap ki.
Da ong u leh wa hapoh ka jylla toh kawa khlan bha u baam doh sniang wei hadooh 18,000 Metric i doh toh iwa hap wow wanrah na baar jylla wei i thmu toh wow pyndap ya ini wa duna hapoh ka jylla.
Kiwi de kiwa klam toh u Pyniaid Sing Syiem, MLA Mawryngkneng Constituency, u G H P Raju, Principal Secretary AH&Veterinary, Dr. Manjunatha C, Secretary AH& Veterinary wa kiwi de.
