Ka Montri ka chnat Agriculture & Farmers’ Welfare, ka Dr. Ampareen Lyngdoh ynne hawa e jubab hapoh ka yung dorbar chna aiñ da pyntip ko wa kat hadooh u snem 2022-23 i thaw wa rep kwai hapoh ka jylla da em i 34,410 Ha wei u kwai wa pynmih da em u 51,650 MT ha uni u snem wa da kdaw iwa da ku na 18,231 Ha ha u snem 2019-20 wei u kwai wa pynih da em u 24,032 MT.
Da ong ko leh wa i ku ye u man wa ha ki snem nachwa ym em biang i chim yukheiñ wei i thaw wa da rep toh iwa da heh nadooh nachwa.
Da pyntip ko leh wa ha u snem 2022-23 u kwai wa da pynmih toh uwa chongdor Rs. 382.22 klut katwa ha u snem 2019-20 won Rs. 173.03 klur, ha u snem 2020-21 won Rs. 235.65 klur katwa ha u 2021-22 won Rs. 203.30 klur.
Kamwa man kattæ ka sorkar da dep wai ko ya 46 tylli ki Processing Unit wa kynthup nadooh ki trep kreh, ki kor khoh skop kwai, ki Solar Tunnel Dryers wa ki thaw pdem kwai ha ki 21 tylli ki Block wa em ha ki 10 tylli ki District kiwa da chongdor waroh Rs. 14.06 klur wei dang em sa 12 tylli kiwa daw pyndep u chna ha ki bnai wow wan.
Da e yarap leh Rs. 10 lak kam ka ram wa khlem sut cha kiwa kwah u seiñ khih wei wow pynlai yaaw ya u kwai kiwa da e cha ki 46 tylli ki Cooperative.
Chooh chooh da pyntip ko wa da e yarap leh dei dawai Bordeaux Mixture yow lait ki dieñ kwai u yap kjut.
U MLA ka Amlarem, u Lahkmen Rymbui da kylli u wa ileh wa da hiar dor u kwai da mar chiteiñ hanla ku i pynmih ya u kwai wei ka sorkar toh u leh ko yeiwa emkaam yow pyntikna wym hiar dor u kwai wei toh u booh da ka Minimum Support Price (MSP) wei ka sorkar pyrdi da dep ko wow booh dor Rs. 200 chi kilo u kwai i wym toh u hiar dor.
Ka Ampareen won da pynche ko wa u kwai ym em pyrtuid u hapoh ki mar rep wa kyrchaan ka sorkar pyrdi tangwa ka sorkar jylla u yaleh ko katwa ye yow yarap ya ki warep kwai kamjooh waroh hi ki warep.
Tangwa neidaw wa da kheiñ yow kwai kam u wym miat yei chait i khiah ki paidbah, ka sorkar da thooh laad ko kammon wow leh yow yarap neibhah uni u kwai toh u mar rep wa mih napoh ka jylla.
U Lahkmen da ong u wa boon ki bru wa chaniah nei rep kwai, kamtæ ka sorkar emkaam ko wow chimkhai yeini.
Neiliang won u Montri Rangbah, u Conrad Sangma da pynche u wa ini wym em de u kwai kam uwi na ki mar rep toh lyngba ka Mission for Integrated Development of Horticulture (MIDH) kawa man ka Scheme ka sorkar pyrdi wei hapoh kani da pyndam yei pyrtuid u kwai.
Da pynche u leh u kwai uwa da dep khoh da dep pynkylla cha kiwi ki jait baam toh uwa ye u dai 10 chah yei dor uwa dei khieh hi-eh wei ka sorkar u lai ko da kani ka luti neini chakhmat.
Da pynche u leh wa i ong wym man iwa miat u baam kwai toh iwa ong ka sorkar pyrdi, tangwa hapoh ka jylla da em da ki hajar ngut ki warep kwai wei kam ka sorkar jylla toh i kaamram yong ka wow kyrchaan ya ki warep.
Da khana leh wa na ki 46 tylli ki Processing Unit, ar tylli toh kiwa em ha Amlarem deiwa pynlut Rs. 1 klur.
Ka Ampareen da pyntip ko leh wa daw chalan leh cha baar ri ya u kwai Supari wa pynmih na kini ki Processing Unit.
Discussion about this post