Shillong: Ka chnat Election hapoh jylla, ynne ka sngi da bichaar ko ya ki kot ki sla yong waroh ki kyrtong wa da thap pyrtuid neibynta wow yakhun ya ka election MP na Shillong Parliamentary Constituency wei napyrdi ki 7 ngut ki kyrtong wa da thap pyrtuid 2 ngut na ki da phah wow pynche biang ha ka 27 wa 28 tarik uni u bnai neibhah wa da em ka ujor pyrchah yei man kyrtong ki.
Hawa yaklam wa u Returning Officer ka Shillong Seat, u Abhishek Bhagotia da ong u wa da thoh cha ki ar ngut ki kyrtong wa kynthup ya u kyrtong na ka KHNAM, u THS Booney wa u kyrtong ka CPI, u Justice Kharbasanti wow pynche hajrong i chah ujor ki.
Da ong u wa ka chnat da yoh ko ya ka kyntu wow dam u pdiang ya ka Form A wa B yong u kyrtong ka KHNAM neidaw wa em i kulmar ha ka kaam president ka party katwa i pynche na u kyrtong ka CPI toh wa chah ujor wa sah ram u ha ka bank.
Neiliang u CEO, u FR Kharkongor da ong u wa ka chnat da paan pynche ko na ki ha ka 27 wa 28 tarik uni u bnai, katwa ki kot ki sla yong kiwi ki kyrtong man ki kiwa biang.
Kam wow pynkynmoo wa ki kyrtong wa thap pyrtuid wow yakhun ya ka election MP cha Lok Sabha na Shillong em ki hadooh 7 ngut wa kynthup na ka Congress u Vincent Pala, u kyrtong wa kyrchaan ka sorkar MDA na ka UDP, u Dr. Jemino Mawthoh, u kyrtong ka BJP u Sanbor Shullai, ki kyrtong laitlooid wa kynthup ya u Romeo Phira Rani, u Samuel Hasha wa ar ngut kiwa da phah paan pynche.
Discussion about this post