Jowai: Ha kani ka Election MP cha ka Lok Sabha kawa dang dep ñiaw Vote ynnin ka sngi da man ko kawa boon dooh wa jop ki kynthai heiwa na ki 542 ngut ki MP wow baam smai, 78 ngut toh ki kynthai heiwa na kini mar 11 ngut toh kiwa jop naka jylla Uttar Pradesh wa West Bengal.
Waroh ki kynthai wa yaleh ya kani ka Election MP da poi ki 742 ngut ha waroh ka ri heiwa ka Congress da pynyeiñ boon dooh ko 54 ngut pynbood won saka BJP kawa pynyeiñ 53 ngut.
Ki MP kynthai da em ki palat 14% ha kani ka 17th Lok Sabha kawa boon dooh nadooh u snem 1952. Haka 16th Lok Sabha da em 64 ngut ki kynthai wei haka 15th Lok Sabha da em 52 ngut.
Na ki 41 ngut ki MP 27 ngut ngut da jop biang ki wa kynthup yaka Sonia Gandhi, ka Hema Malini waka Kirron Kher wei i jop wa rap pawnaam toh yaka Smriti Irani kawa pynrem ya u Rahul Gandhi ha Amethi.
Katwa ka Actress Bollywood ka Urmila Matondkar kawa yaleh naka Congress ha Mumbai North Lok Sabha Seat kawa man leh ka sien wa nyngkong ya ka da rem ko ha u kyrtong ka BJP u Gopal Shetty.
Kiwi de ki Party wa pynyeiñ kyrtong MP kynthai wa rap boon kynthup yaka Bahujan Samaj Party (BSP) kawa pynyeiñ 24 ngut, ka All India Trinamool Congress 23 ngut waka CPI(M) 10 ngut.
222 ngut won toh kiwa yeiñ kam ki kyrtong samen.
Ka jylla wa boon dooh kiwa yeiñ kyrtong MP kynthai toh ha ka jylla Uttar Pradesh 104 ngut.
Discussion about this post