U Montri Rangbah ka jylla, u Conrad da pyntip u wa ha i lai u cha Delhi ini wa dep, u Tribal Affairs Minister da pyntip u wa ka Ministry da rai ko wow kynthup lang ya kiwa boon ki chnong wa em cha nongkyndong yow pynku ya ki ha ki jylla wa em ki jaitbru ri-loom hapoh ka ri.
U Conrad da pyntip u wa ka Ministry da jied ko ya 836 tylli ki chnong hapoh Meghalaya kiwa ha kini ki 5 snem daw pynku ya ki deiwa pyndap leh ya ka poisa wa duna lada emkaam.
“Ka thong toh wow pynman ya kini ki chnong kiwa ye wow yieñ ha ki kjat yong ki hi deiwa pynbiang ya iwa emkaam ki,” da pyntip u.
U Montri Rangbah da pyntip u leh wa ka Ministry of Tribal Affairs daw yarap poisa ko ya kini ki chnong 5 snem.
U Conrad da pyntip u wa heipor wa lai u cha Delhi, ka sorkar jylla da paan yarap poisa chooh chooh ko lyngba ka CRF (Central Road Fund) wei heijooh i por da paan yarap chooh chooh ka poisa neibynta wow yoh u chna ya ki National Highways.
Hajrong ini da pyntip u wa ha waroh kini ki ar jait ki kaam da yoh yei jubab wa biang na ka sorkar India.
Da pyntip u leh wa da yachem u wa u Jal Shakti Minister heiyatoh wa ka Jal Jeevan Mission kamjooh leh wow chna ya ki kaam pynpoi um cha ki thaw rep. Wei da paan leh ya ka poisa wa sah ka jylla kawa kamwa T. 70-80 klur.
“Heijooh i por da paan leh ya sa 70 tylli ki kaam hapoh ka Minor Irrigation wei ka sorkar India leh da pyrkhat ko ya ini,” da ong u Conrad.
