Heiyatoh wa i jia ha St. Xavier’s College, Umoid haka 24 tarik uni u bnai, neiliang ki pulit da pyntip ki wa haka 19 tarik uni u bnai, 8 ngut ki wakreh mylla kiwa na chnong Ujnghagrar Char, South Salmara, Mankachar District, Assam da poi ki wow kreh ha St. Xavier’s College. U waheh chnong deilang wa u Secretary wa kiwi ki dkhot ka chnong Umoid-Shaidshaid hadien wa tip ki yei wan kini ki wakreh mylla, da lai ki cha St. Xavier’s College yow kyrpaad ya u phadar ka College wym toh u booh ya kini ki wakreh hapoh ka chnong katwa ym pu ye u pynbiang thaw ya ki. Ya ini i kyrpaad da pdiang da u phadar uwa haka jooh ka sngi da kyrriah ya kini ki wakreh cha ka Nativity School Mawkyrwat neibynta i chngaaiñ yong ki.
Haka 23 tarik uni u bnai, u phadar ka College da phah chithi u cha ki bor chnong yow paan pynche wei haka jooh ka sngi da pynman yaka yachemlang hapyrdi u phadar wa ki bor chnong heiwa ki bor chnong da e bor ki ya kini ki wakreh wow sah ki ha i thaw wakreh ki ya kani ka College hadien wa da kular ki bor chnong wa ym jia iyi iyi ya ki, heiwa hadien ini da kyrriah ya ki cha i thaw wakreh ki ha St. Xavier’s College haka 24 tarik heipor kamwa 7:30 i step.
Tangwa ha kani ka jooh ka miet heipor kamwa 11:30, da em kamwa 20 ngut ki damok ki wym tipmit kiwa da psiah yabor cha i thaw sah kini ki wakreh mylla kiwa da yut hadien wa dep ki wow dat ya ki.
Waroh kini kiwa kreh mylla da mynsoo ki wei da kit yaki syndon cha ka Mawkyrwat CHC yow yoh ki yei sumaar, na kini ki 8 ngut, arngut kitæ u Raju Mondol wa u Shahinoor Alom da mynsoo joor ki wei da kit won yaki cha Civil Hospital, Shillong yow yoh ki yei sumaar heiwa u Raju Mondal da khlaad noh u nei mynsoo u.
Heiyatoh wa ini, da yoh yaka FIR wei da pynman yaka takit hapoh ka Mawkyrwat PS Case No. 01(2)2021 U/S 447/450/324/326/302/34 IPC wei ha kani ka takit da ksoh ya 3 ngut yow takit yaki heiwa da kem ya uwi katwa ynne ka 27 tarik da kem sa ya 2 ngut.
Hajrong ini, ki pulit da pyntip ki wa ka takit dang lai ko chakhmat yow tipmit ya kiwi kiwa emkti ha ini i kaam, neiliang ki pulit ka Meghalaya da kyrpaad ki yaki paidbah wow yait nei chim yaka aiñ hei kit yong ki, wow pynthut yei suk i saaiñ hapoh ka jylla neidaw wa daw pynchitom ya kitu kiwa chim yaka aiñ ha kti yong ki.
