U heh ka Bharatiya Janata Party (BJP) uwa pait ya ka jylla Meghalaya, u Dr. M Chuba Ao da ong u wa kamwa man katni, ka sorkar pyrdi dang bichaar bniah bha ko ya i dawa ILP ha Meghalaya deiwa ong wa ini ymtoh i kaam wa chi sngi neibhah wa hap bichaar bniah lada pynkrehkaam ya ka iyi wow myntoi wei iyi u dooh myntoi.
Da ong u wa kamwa man katni, ka Meghalaya em ko ya ka Sixth Schedule kawa man ka lamieñ wow yada ya ka jylla deiwa pynrap wa ymtoh u jhan wow dawa pynkrehkaam ya ka ILP.
Hajrong i kylli wa lada ha Manipur ka sorkar India e ko ya ka Inner Line Permit du ha ka chi sngi, neiliang u Chuba Ao da ong u wa i long i man ha Manipur yaphær i lada wyrchaw wa ka jylla Meghalaya, neibhah ha Manipur em palat 20 tylli ki seiñ kieñ suloi kiwa mih wa psiah lyngba ki khappood wa ka Myanmar.
Hajrong i maham yakhih kiwa kitkaam ka BJP wow dawa kyrriah kaam ya u Ernest Mawrie kam u President, u Ao da ong u wa ha ka yalang da yaklam yillu bha hajrong kani ka kaam wei da ye u pynbait ya ini waroh deiwa bahkhlieh leh wow chimkhia ya i awri waroh.
Da ong u wa katni waroh kiwa kitkaam wa ki dkhot ka Party da yakrehlang ki chirup.