Ki pulit ka East wa West Jaiñtia Hills deiwa krehlang ynnin ka 3 tarik da yoh ki wow kem ya ki 2 ngut ki bru wa suba toh kiwa thmu wow lai tympdung yaka Toll Plaza wa em ha 7 Mer, West Jaiñtia Hills.
Ya kini ki bru da kem na Wahgate, Jowai wei na ki da yoh ya ki tiar wa pynemkaam wow tympdung wa kynthup ya 5 tylli ki Gelatin Stick, 10 tylli ki Detonators wa ki Fuse Wire.
Kini ki ar ngut ki chynrang na West Jaiñtia Hills da kem wei da suba joor wa thmu ki wow tympdung ya kani ka Toll Plaza.
Heiyatoh wa ini neiliang ki pulit dang pynman ki ya i takit wa joor wow chem yeiwa sakhiat.