Ynne ka sngi seiñ kawa pait neibynta i bha i miat ki bru kiwa emkaam ya i yarap wa kyrpang (Persons With Special Needs) ya kawa tip kam ka Ephphatha Society da e yarap ko ya ki 35 ngut ki bru ha ka chnong Umsatai, Ladwahwapung, Deiñsatlang wa Pynurkba kiwa em ha East Jaiñtia Hills District.
Chwa wow yoh u saam ya ki marbaam wa kynthup ya u khoo, sallah wa u dai da yoh yei klam pdiang burom na wa i e khublei na ki Waheh Chnong yong kini ki chnong kiwa kynthup ya ki ASHA wa ki Anganwadi.
Neiliang ki bei ki pa yong kini ki khynnah da dap ki dei mynsien wa lung hajrong i wan e yarap ka seiñ ya ki deiwa pynsñiaw wa ini i wan ka seiñ da pynyohbor ko ya ki.
Ki manbei manpa da e khublei ki leh ya ka Society heiwa da man ko ka sien wa nyngkong wa da em kam ka kawa da kyruiñ cha ki khon ki kti yong ki kiwa emkaam yarap wa kyrpang deiwa kitbok leh ya ka seiñ wow ye ko u tia chaphrang ha ki kaam yong ka.
Ka Faithfulness Siangshai kawa man leh kam ka Finance Officer yong ka Society da e khublei ko ya ki khon ka seiñ wa ya kiwi ki lok kiwa da e yarap kyllooid mynsien neibynta ini i kaam.
Kani toh katkam ka Wyrta na u Heipor Uni Bang uwa man kam u Media Operator ka Ephphatha Society.
