Kawi ka kari Scorpio wa em ya u Number ML-10D-8897 ynne i step synyaw da lai tyrrah ko ya ka khyrdop COVID Screening Centre wa em ha Umling, Ri-Bhoi heiwa da sih joor ko neibynta iwa nakhmat.
Kani ka kari toh kawa wan neiliang Shillong kawa hiar cheiliang Nongpoh heiwa heipor wa poi chwa ha Mawiong da em kawi ka kynthai wa pynsangeh kari heiwa u tre deiwa yoo wyrai da sangeh u wow kit ka tangwa mar ya wai dwar da mih syndet arngut ki chynrang wa psiah chapoh kani ka kari.
Kini ki chynrang da maham pynyap ki ya u tre kari wei wow rah ya oo cha thaaiñ Byrnihat wei da chim ki leh wow yah ya ka kari.
Hadien wa liwan wei manda poi ha katai ka Screening Centre, u tre da knieh u ya u Steering kari hadooh wa lai tyrrah kari ha katai ka thaw neibhah wa u tre kari tip u wa em pulit ha kani ka thaw yow ye u lait wow yoh u yut.
Hadien ini, kini ki damok da knieh ki leh ya ka poisa wa T. 1 lak uni u tre kari, ka Phone waka Smart Watch wei da yut ki da kawi won ka kari rong lieh kawa ym ye u tip.
Uni u tre kari mar ya yoh u wow yut da pyntip u wut wut cha ki pulit kiwa da lai yang ya ka kari ha Umsaw tangwa hadooh kattæ ym pu em pyntip wa lada yoh kem ya kini kiwa emkti.
