Ki pulit ka East Jaiñtia Hills ynne i step ka 24 tarik hadien wa da yoh yutip wa tikna wa em ki nong Bangladesh kiwa daw psiah tooh chapoh India lyngba i khloo i wym pu em kær pood, kamtæ da lai ki pulit ka Umkiang PPP wa ki yong ka Ratacherra Infiltration, CP hei yahkhmat u SI. S. Buam wa u SI. E. Pohchen wei da yang khap ha Pyrtakuna wa Kuliang.
Hadien kattu katni por da yoo ya ki bru hapoh khloo ha Kuliang deiwa yahkhmat da uwi wa tip luti hadooh wa poi cha u sarok NH06 ha thaaiñ Kuliang wei uni da mih u wow pynbait kari yow kit ya kiwa yahlang u kiwa dang rieh hapoh khloo.
Kamtæ ki pulit da mih ki wow kem ya oo tangwa da yut u chapoh khloo wei da kdong ki pulit oo hadooh wa yoh wei na oo da yoh ya kawi ka wait wa ka Mobile Phone wei da rah ya oo cha Umkiang PPP yow takit.
Uni u bru da khana u wa i pyrtuid u toh u Misba Uddin uwa na Bangladesh wei da phla u leh wa da jooh leh ya ini ki kaam da boonsien hapoh ka District wei da chem leh uni man u leh u snar wa da chalan thooh da slem wei emkti u wow wanrah da boon ki bru cha India, kamtæ da kem ya oo wei ka takit dang lai ko chakhmat.
