U Symbood Montri Rangbah ka jylla, u Prestone Tynsong da ong u wa ym kwah u wow pynlut por wa u Saket Gokhale wei ym em por hi u leh wow yaklam wa utæ uwa e ktien yong ka All India Trinamool Congress.
Ini i klam u Prestone uwa man leh u National Vice President ka NPP toh hadien i pteiñ u Gokhale wow kob ya ka sorkar MDA deiwa khut yatai nia mar samen hakhmat yong kiwa thoh khubor.
Da ong u wa u Gokhale ym tip u yei rukom krehkaam, deiwa pynrap wa em u yei hok wow yoh yutip we ileh ym paan u da ka RTI, ym du wow ong da ka ‘Debate’.
U Prestone da ong u wa lada toh utæ uwa e ktien toh u klam da uwa na kani ka jylla Meghalaya. Da ong u wa ka Meghalaya Pradesh Trinamool Congress toh u khana ko wa lada mut ki wow pynyieñ kyrtong MP da u Gokhale na Meghalaya næ, hap ki wow batai iyi mut ki.
U Symbood Montri Rangbah da ong u wa kiwa yahkhmat ka AITC na ka jylla Meghalaya em ki i hok kam ka Liang Pyrchah wow kylli ya ka sorkar wei wow leh da ka RTI.
Kam wow pynkynmoo wa u Gokhale da kob u ya u Symbood Montri Rangbah, u Prestone Tynsong wow yatai nia mar samen hajrong ka synchaar khadar wei da kob u leh ya u Montri Rangbah wa ya ka sorkar MDA wow yatai nia mar samen hakhmat ki laad pathai khubor hajrong i pynkrehkaam ya ki Smart Meter, i haap yong ka tnoom kyllung ka yung dorbar chna aiñ wa thymme, i pynkreh ya ka Shillong Smart City, i pynkreh ya ka Saubhagya Scheme wa i baam tooh hei thied kari ha ka chnat pulit.
