Ka Singapore da phah ko wow pynuiñ biang ya u musli musla wa ka’it bha ki bru ha India wa tip kam u Everest Fish Curry Masala hadien wa ka chnat wa pait yei bha i miat ki baam ki dih, ka Singapore Food Agency (SFA) haka 18 tarik uni u bnai da ong ko wa da chem wa ha uni u Masala da em chiboon i Ethylene Oxide i wym miat u pynemkaam ki bru.
Ka SFA da ong ko wa i Ethylene Oxide toh i Pesticide wei ym chah wow pynemkaam ki hapoh i baam tangwa chah du heipor wa pynkhooid donhi ya ki mar wa pynmih ya ki baam.
Kamtæ da phah ya ka Sp Muthiah & Sons Pvt. Ltd kawa chalan ya uni u Everest Fish Curry Masala na India won wan li thooh oo neidaw wa em ini i Ethylene Oxide palat yeiwa chah.
Neiliang kiwa pynmih ya uni u Masala da ong ki wa ka Everest toh ka Company kawa la 50 snem tam wei waroh ki mar wa pynmih ki toh kiwa bood ya waroh ki kyndon heiyatoh wa i khooid wei bha ki mar chwa wow phah ki cha ki thaw dai. Najrong wa bood leh ya waroh ki kyndon wa da booh da ka Indian Spice Board, FSSAI wa kiwi de.
Chooh chooh da ong wa chwa wow chalan cha baar ri da pait sylli ya ki mar da ka Spice Board ka India.
Neiliang won ka Singapore da ong ko wa uni u Masala ymtoh wow pynemkaam ki bru neibhah yei Ethylene Oxide toh iwa pynemkaam kam i Pesticide yow siat dawai khñiang ya ki mar rep wei da khang wow pynemkaam ki ha ki mar baam wei ki aiñ hapoh ka Singapore chah ko wow pynemkaam Ethylene Oxide du heipor wa pynkhooid donhi ya ki mar wa chna Masala.
Chooh chooh da ong wa manda khlan u baam ya ki mar wa em ini i Ethylene Oxide daw wanrah ko yei kjut i chitom.
Discussion about this post