Ka Khasi Students’ Union (KSU) Lumshnong Unit wa Narpuh Circle da pynsñiaw ki yei diaw hajrong i dooh bordiñ hapoh ka chnong Lumshnong waka thaaiñ Narpuh hi waroh kawi nadooh ka 29 tarik u bnai wa dep (April) hadooh ynne ka sngi.
Ka seiñ da ong ko wa ymtip de mynnu u yoh bordiñ deiwa pynrap wa em hi i joor u slap waka la’ær ha kini ki sngi heiwa da pat ki dieñ wei da tkut leh ki sainar bordiñ tangwa hawa jia kam ini to u pynsmat wow pynchna tangwa da hap bait wow yang wow leh ka MeECL yei kaam.
Da ong leh wa ki thaw wa lai ki sainar bordiñ ym jooh em wa pynkhooid neidaw wa duna ki Lineman wei ini ymtoh de i sien wa nynkong tangwa iwa da jia ma jia ha waroh ki 12 bnai u snem neidaw wym em kiwa mihkhmat wa pait.
Ynne ka sngi neiliang ki dkhot ka KSU da lai ki cha Lumshnong Sub-Station yow kylli yei daw wei da pyntip wa da pyndooh bordiñ waroh lynter neidaw wa sih ka kor wei ym em tiar wow pynchna wei da hap wow rah cha Khliehriat wei wow taan hi-eh ya kani ka kor leh ym ye.
Kamtæ ka seiñ da kylli ko kammon sang kat ka Sub-Station leh ym ye u pynbiang tiar yaka wow chna manda em iwa sih.
Hajrong ini waroh da beiñ yeini i kreh khaler wei pynslem u pynchna tangwa iwa da phylla won wa ka bai bordiñ ym jooh duna ko kajiak leh.
Discussion about this post