U Montri Rangbah ka Meghalaya, u Conrad K. Sangma ynne da lai pait u yei kreh yow pyndait yaka kor wow pynkhlaad jhep namo ka Waste Segregation Machine wa da booh ha Songgital wa dang em hapoh ka Tura, West Garo Hills heiwa da emlang u Montri ka chnat PHE, u Marcuise Marak wa u Chairman ka MUDA, u Wailadmiki Shylla.
Hadien wa pyndait ya kini ki kor, daw pynemkaam da ki Tuck waki pooh chi loom yow tih wei kit yei jhep wa da em ha ini thaw noh jhep heiwa daw pynkhlaad ki ha ki le bynta kitæ kiwa daw pyut, kiwa ye u kopdiñ waki moo ki deiñ deiwa pynemkaam da kani ka kor.
U Conrad hawa khana chaphang ini da ong u wa i stat namo ka Technology wa pynemkaam toh kawa dadep pyrchang ha Marten wa i thaw noh jhep hapoh ka chnong Tinsukia, Assam.
Da ong u leh wa da phah ya waroh ki Municipal wow pyntikna ki wa i jhep toh iwa dadep pynkhlaad chwa pyn na yung.
“Ini i jhep wa da neh da boon boon snem ha Rongkhon Songgital toh iwa da sdang wow pynmih boon jait i pynthut ya kiwa chong chnong ka Tura, wei yooluti i wa hadien wa sdang kani ka thaw u krehkaam daw ye wow pyndooh ya waroh iwa eh,” da ong u Conrad deiwa pynrap u leh wa da yooluti wow sdang noh ko u krehkkam ha kini ki bnai wow wan wei u pynkhooid yei jhep daw chimpor chi snem u leh.
Hawa kylli wa lada daw pynkylla rngaw yei jhep deiwa ye ki paidbah wow pynemkaam, da jubab u wa da em i pyrchang wow leh yeini tangwa iwa mih neini wa pyrchang ym em miat i wei na itæ i daw da pynemkaam da kani ka kor wow pynkhlaad yei jhep wei daw dai ki cha ki bru wa kwah u thied tangwa i jhep wa hoi, daw pynkylla ki chei sboh.
Discussion about this post