U Symbood Montri Rangbah ka jylla uwa pait leh yaka chnat pulit, u Prestone Tynsong da khana u wa ka sorkar da phah ko ya le tylli ki pyrtuid neibynta wow chimkti yei kaam Director General of Police (DGP) ka Meghalaya, wei napyrdi kini da emlang wei pyrtuid ka Idashisha Nongrang kawa man ka IPS yong u snem 1992.
Ka samoi krehkaam yong u DGP wa katni ka Meghalaya, u Dr. LR Bishnoi u kut noh ko haka 19 tarik uni u bnai wei katkam wa khana u Prestone, ka sorkar dang yang ko yei mynjur na ka Election Commission of India yow ye u thung thymme, neibhah i pynkrehkaam yaka Model Code of Conduct u neh ko hadooh ka 4 tarik u bnai wow wan neidaw wa dang em ka Election Lok Sabha.
Hawa kylli, u Prestone da ong u wa ka sorkar da pynkhreh ko nadong chadong wei da sah sa du wow pynbna hadien wa da yoh yei mynjur na ka ECI. Da khana u leh wa em san ngut kiwa ka sorkar da phah ko yei pyrtuid cha ka Union Public Service Commission, tangwa ar ngut na kini da pynsñiaw ki wym kwah ki u chimkti ya ini i kaam, kamtæ da em sa le ngut wa kynthup yaka Idashiha Nongrang wa ar ngut na Assam, u Ram Prasad Meena (IPS 1993) wa u Deepak Kumar (IPS 1994).
Kam wow kdaw heini wa kiwa boon ki seiñ napoh ka jylla da pynhær chithi ki cha ka sorkar wow thung bait da ka Idashiha Nongrang kam ka heh dooh yong ki pulit ka Meghalaya, hadien wa u Bishnoi u chong-ngiah noh u.
Discussion about this post