Slem i yoh tulop kiwa sikai SSA neidaw wym sangeh yakhih kiwa kreh SSA

Ka Samagra Shiksha Abhiyan-State Education Mission Authority of Meghalaya (SSA-SEMAM) kawa em hapoh ka chnat Puræ Puthi ka sorkar Meghalaya da pyntip ko wa ha ki snem wa da lai da leh ko chiboon neibynta i bha i miat kiwa kreh wa em hapoh yong ka wa kynthup ya kiwa sikai skur yow pynlait ya ka poisa heipor wa biang.

Da ong leh wa da yaleh wow pynlait ya ka tulop kiwa kreh ki wym man kam kiwa sikai namo ki Non-Teaching Staff wei da leh yeini deiwa booddien wa ka Ministry of Education ka sorkar pyrdi yow pynlait ya ka bhah poisa wei da booddien leh hadooh wow yaklam yow pynku tulop.

Wei neiliang ka sorkar jylla da mynjur ko wow pynku ya ka tulop ki Non-Teaching Staff da 25% tangwa ka seiñ kini ym pdiang ki wei da lai ki chakhmat wow pynman yakhih deiwa chong kyllaiñ myngngor heiwa ka sorkar da thung ko da ka Rationalisation Committee wa khlieh da u Commissioner & Secretary ka chnat Puræ Puthi deiwa emlang ki dkhot ka seiñ kiwa kreh SSA wei dadep wow yachem la le sien heiwa da tyrwa wow kheiñ ya ka Base Pay katkam ki snem wa da chakri ki wei wow pynku da 5% man-u-snem deilang wa kiwi ki myntoi wow e yarap da ka sorkar.

Kani ka Committee da pait ko leh yei rukom su tulop ya kiwa kreh ha ka jylla, District wa ha ki Block wei da chem wa kiwa kreh ha Block emkaam wow rap pyrkhat neibynta yong ki wei da tyrwa wow pynku da 100% ka tulop neibynta ki kattu katni ki jait kreh kiwa da emkaam bha wow pait deiwi wei da ya mynjur wa da lada pynku bait kat jooh ya waroh ym man ko kawa yahaap.

Related posts

Da chim ya ka Statement u pulit wa yah ya ka kari wa ya tyrrah wa ka thuk-thuk

November 24, 2024

Thung ka sorkar da ka Committee yow pynthymme noh yei rukom krehkaam ka MPSC

November 24, 2024

Tangwa wot hapyrdi ini waroh wa da ya mynjur wow leh, kiwa kreh dang pteiñ ki yei yakhih hadooh wa da slem u pynlait ya ka tulop kiwa sikai iwa da ktah leh yei kaam wa em hapoh ka SSA katkam ka Right To Education wow pynlait ya ka Uniform Grant, Library Grant, ki School Grant wa kiwi de.

Kiwa sikai SSA da em ki palat 10,000 ngut wei ym pu em yoh ki ya ka tulop neibynta u July hadooh katni neidaw wa kani ka yakhih dang pteiñ ko.

Neiliang ka sorkar da yaleh kow wow thooh laad deiwa phah kreh da kiwi kiwa na kiwi ki chnat sorkar yow ye u pynlait noh ya kani ka tulop lyngba ki PFMS wei ini waroh daw pynslem ko leh yei pynkemkaam ya ka First Installment wa phah ka sorkar pyrdi wei lada slem u pynemkaam ya kani, ka sorkar pyrdi ym pynlait ko ya ki Installment wa bood kiwa em soo tylli ha chi snem.

Kamtæ da ong wa kini ki Non-Teaching Staff da emkaam wow lai biang ki chei thaw kreh yong ki yow lai bait ki kaam.