Kiwa yahkhmat ka Dorbar Chnong Mukroh Pyllun ynne da yoh ki wow yachem wa u MP ka Shillong, u Dr. Ricky A.J. Syngkon hawa wan u cha Barato yow pynsñiaw yei chem chitom kani ka chnong wa em ha khappood waka Assam.
Da pynkynmoo leh ha u MP yeiwa jia ha ka 22-11-22 heiwa da dooh yei mynsien ki 5 ngut kiwa chong chnong deiwa chah siat ha ki bor ka Assam wei hadooh katni i bichaar yeini dang kiaw kiaw, kamtæ da kyrpaad wow lai yaklam u neibynta kini ki 5 ngut yow ka chnong yei hok.
Da ong ki leh wa katkam ka Map yong ka Dorbar Chnong wa da e cha ka JHADC, u pood yong ka chnong toh hadooh Mootha Siangkwai wa tip leh kam ka Umsapar uwa jrong hadooh 8 Km na pyrdi ka chnong Phlong, wei ha tymbud kini ki thaw, kiwa chong chnong da ya rep ya riang ki wei boon ki pynthor kba ki em ki ha kini ki thaw wei kini ki thaw toh yong kiwa chong chnong.
Tangwa hadooh katni ki bru yong ka sorkar Assam lyngba ki pulit yong ki kiwa em ha Mookoilum, Kherni wa ki Forest Guard da chna ktem ki ha Khliehsanaro kawa man ka thaw wa dang em hapoh u pood ka chnong yow pyndik wei pyntieñ pynsmiej ya kiwa chong chnong kiwa lai kreh wei lai rep cha kini ki thaw wei hawa kit ya ki dieñ wa da yap yow thang diñ wa ki phlang yow tymmoh yung, kini ki bru ka Assam da khang wei da jooh daiñ ki da ka kuna kawa heh.
Da ong leh wa wot ya ka BOP wa da kular wow chna da ka sorkar Meghalaya iwa da toh u chna ha Mukroh leh hadooh katni ki pulit dang yieñ sonteri ki ha itu i thaw wa jia i yasiat wei da sah ki ha i yung wa chna malu mala wei hadooh katni kani ka BOP ym pu yieñ ko.
Kamtæ da kyntu ya u MP wow sñiawbha u yaklam neibynta ini i eh wa kam ka chnong da maad ko da boon tylli ki snem hadooh kattæ.
Da kyrpaad leh na u MP wow pynyoh Community Hall neibynta ka chnong neibhah kamwa man kattæ lada hap pynman yalang da hap pynman ha madanbol.
Discussion about this post