Ka Shillong Medical wa ka Tura Medical College kiwa da pun ka sorkar nadooh palat chiphaw snem ym pu ye wow pynmih iyi iyi hadooh katni, katwa ka University of Science and Technology of Meghalaya (USTM) u sdang noh ko yei puræ Doctor deiwa pdiang ya kiwa lai puræ nadooh uni u snem hadien wa da wai ya ka PA Sangma International Medical College and Hospital.
Hawa klam hajrong ini, ka Ampareen Lyngdoh kawa man kam ka Montri ka chnat i khiah da ong ko wa ka sorkar dang pynkhreh pynkhrum ko.
Ka sorkar jylla da pynkhreh ko wow seiñ ya ka Shillong Medical College wa yaka Tura Medical College deiwa pynman ya ki Hospital kam ka Ganesh Das wa ka Shillong Civil Hospital kam ki thaw puræ tangwa hadooh katni dang sah ha suiñ.
Ka Ampareen da ong ko wa ka Shillong Medical College dang pynkhreh ko wow pynbiang ya iwa emkaam kam i wow booh 400 tylli ki palong, i emkaam thaw, kiwa sikai wa kiwi kiwi. Tangwa heijooh i por da ong wa ki paidbah ymtoh u sñiaw artatien ki yei lai i kaam, wei ka sorkar hap ko wow pynbiang ya ki jnit ki jnat.
Da ong ko wow yoh ya kiwa sikai man ko iwa emkaam dooh iwa da pynkjut khlieh ya ka sorkar, neitæ ka Service Rules ya ki wei ini toh i daw wa pyman yow pynslem. Da ong ko wa da biang i em ki Doctor kiwa ye wow sikai kam ki Professor, wa kiwi wa emkaam, tangwa ym man iwa suk kam ki Medical College wa sdang da ki bru samen kiwa ye wow pyndep yeiwa emkaam wut-wut iwa yaphær na iwa hap lai ka sorkar tok pa tok.
Da ong ko wa da kyrmen wow ye u pyndep yeiwa emkaam ha snem 2025, wei ka sorkar da emkaam ko leh ya ka poisa yow pyntyllung yei kaam.
Discussion about this post